Hajiji minonorikohon Mitingan MTPNg.
KOTA KINABALU: Ikonomi Sabah nokoposurat kinoburuon di kounsub soira’ Kolobusan Suang Pogun Kasar (KDNK) nokoingkawas mantad RM82.1 bilion di toun 2022 kuminaa RM83.2 bilion di toun 2023, ka di Boyoon Montiri, Datuk Seri Haji Hajiji Haji Noor.
“Iti nokopokito waya’ kinoponginsonongan di po’ompus om koburuon osonong id Sabah,” ka disio i minoboros do ilo’ kopiongoi di KDNK pomogunon i pikikiro koingkawas soginumu’ 2.5 pihatus maya’ Kerangka Ikonomi Madani i nokopokito pinonguludan kawagu ikonomi Malaysia id siriba’ Bajet Pogun 2025.
Minonorikohon Mitingan Kounsol Karaja’ Koburuon Pogun (MTPNg) id Menara Kinabalu di tadau baino’, Boyoon Montiri minoboros, naangayan nopo dilo’ nga’ mantad no piuhupan mogisusuai bohogian id pogun diti.
“Nung tumilombus tokou popouhup ginoris miampai osonong maya’ pisokodungan ogirot, tantu’ nopo dati’ do kopoindalanan angkab Sondikoton Sabah Maju Jaya (SMJ) miampai poinlantoi,” ka disio.
Minongunsub isio tongo’ kotinanan ngaawi’ poinggompit do papatantu’ oinsanan inggisaman om ababayan id siriba’ Palan Malaysia Ko-12 (RMK12) nogi’ palan koburuon Sondikoton SMJ koindalan montok papasarok kosunion ikonomi om mongingkawas kasasanangan rayat.
Id siriba’ RMK13, ka di Boyoon Montiri, koporintaan pogun nakapamalan Sondikoton Kosudong Koburuon Pogun sabaagi laang montok papasarok ikonomi om koburuon Sabah mimpuun toun 2026 gisom 2030.
“Ilo’ po nogi’ nga’ palan tosopung i maganu kokiraan katatapan, palan induk om pamalanan koburuon maso-maso. Mogisusuai inggisaman maan pogurao’ kaampai inggisaman Ikonomi Obulou om tikid ababayan koburuon pogun id siriba’ RMK13,” ka disio.
Sundung mogisusuai kinalantaion di nosigampot maya’ inggisaman Sondikoton SMJ om numbur ngaawi’ di osonong mantad kointalangan i pinalabus gisom noondo diti, ka di Hajiji, koporintaan pogun amu’ kasaga’ obinsontob ginawo om kalawong.
“Nuru’ tokou tumilombus kumaraja agaras. Oinsanan kopomuruanan pogun, luguan ngaawi’ koupisan nogi’ lansanon id nayatan watas mositi’ no do mindahu’ lobi kasaru’ montok miontong kopoindalanan ababayan toi projik i masaan poindalan.
“Iti oponsol montok papatantu’ oinsanan ababayan koindalan miampai osonong om poinpuli,” ka disio i minongoput do soginumu’ 1,265 projik om ababayan kiguno pongohon id Sabah do toun diti.
Oinsanan kotinanan popoindalan, ka disio, mositi’ toririmo miontong kinoburuon projik ngaawi’ diti om papatantu’ dilo’ opongo tumanud timpu.
Ka disio, Sabah nopo nga’ wookon mamaramit kinopoobian bobos akawas mantad Bajet Pomogunon, miampai RM6.7 bilion pinoobi’ do koporintaan Pisompuruan toun diti.
“Iti kopokito rolou rayat om lansanon Sabah pokinongohon id nayatan Pisompuruan. Ilo’ po nogi’ kopokito do otootopot tokou om tumilombus minggisom poposikap koburuon pogun,” ka disio.
“Kiguno tokou popowonsoi kosimbanon montok papatantu’ kalantaion oinsanan palan dati’. Nuru’ tokou monongkiad ‘proses’ laid om monimban pogoyuon i moningkanan nopo do haal poinsala’ miampai amu’ mangadang toi mamagatang kinalantaion nogi’ kinouhupan kumaa pogun,” ka disio kawagu.
