KOTA KINABALU: Rayat id pogun diti nunsub do tumilombus monginggirot ‘ukhuwah’ (sunduan piobpinoian) om sunduan pisompuruan maya’ nubasanan mogitotombului om mogisisiou ontok pamaramaian Aidilfitri.
Molohingon Agayo Pogun (TYT), Tun Musa Aman minoboros pisompuruan di ogirot nopo nga’ impohon kumaa koburuon om kalantaion sosonginan pomogunon.
Om nogi’ ka disio, maya’ pisompuruan di ogirot, rayat kaanu monoguang koinsanai kaantaban i rumikot om monsupu’ kosiwatan po’ompus montok moningkawas kasasanangan koposion oinsanan.
“Iti koposili Aidilfitri sabaagi ‘wasilah’ (ralan) monginggirot pisompuruan sompipi’ tulun Islam om mogigiyon do oinsanan suai ko’ mamaramai kinalantaion id kinopoburuan sumunsung pogumbalan nogi’ kaantaban ‘ibadah’ puasa miampai ‘takbir’, ‘tahmid’ om ‘takdis’ (kopomituahan).
“Aidilfitri okon ko’ iso’ karamaian ugama’ nopo, nga’ nosili kosiwatan montok monginggirot po piromutan om pogihuhungan id pialatan puru paganakan, sombol walai, koombolutan om mogigiyon.
“Id koyuon di poinponu’ piuludan diti montok papaanjur nubasanan pogipapantangan, otulid pogogoyuon, amu’ momuntuk nantadon sosial, tinaru om ugama’,” ka disio ontok pinapatahak Pason Pinotomod Tadau Raya Aidilfitri 1446H/2025M.
Tun Musa nga’ minagangat tulun Islam do mongingkawas nubasanan miilang nindopuan miampai tinimungan di momoguno miagal fakir mosikin, tina’ sosongulunan, tangaanak yatim om sopiagal dilo’.
“Nubasanan mogiilang nindopuan okon nopo ko’ poposindak koyuon Aidilfitri, nga nogi’ iso’ inggisaman royohon id kopotontuan aiso’ i oiduanan doid kinomogoton.
“Toluod ‘amal jariah’ di patahakon ontok tadau raya diti, sokuukuri’ do koponginggaan tonggungan dilo’ i amu’ songkuro kinonosipon, potilombus dino kopokito kopodulianan di akawas di tongo’ puahang kumaa rayat id pogun diti,” ka disio pinopointalang.
Ontok pinapatahak pason dau dilo’, Tun Musa pinoposorou nogi’ do rayat karait di kolidasan tinan nopo nga’ oponsol om kiguno onuan kopomodulianan po’ompus pamaramaian Aidilfitri.
“Tonudon gaya pamakanan di olidas ilo’ nopo nga’ kadala’ mindala’ do makan om pitamangan o nubasanan pamakanan om popowonsoi tongo’ kaparagatan i kapanahak waya’ osonong kumaa kolidasan miagal monguyat tinan om sopiagal dilo’,” ka disio.
Suai dilo’, pinosotol nogi’ disio o koponsolon poposuul koumoligan id kapamaramaian Aidilfitri om mongilag nunu nopo haal i kikosiwatan koponinong kadaaton.
“Toririmo monidsorou soira’ papamanau miampai mananud kooturan talun-alun soira’ papamanau padsakaian muli’ kumaa kampung, porisaon padsakaian sompoopori pogulu monimpuun pamanahan om posuulon koumoligan tulun ngaawi’ di koupusan.
“Id tadau kagayaan di obitua diti, unsubon ku rayat mooi do oinsanan mamagatang tonggungan om kolubukan tinimungan kiunifom i toririmo momoduli’ om ogirot manamong koumoligan rayat om pomogunon miampai amu’ monimud koyuon.
“Kanou tokou no momuhondom om mamagatang tinonggungan di pinatahak diolo’ kumaa pomogunon miampai sumambayang kalansanan diolo’ toririmo id dolundung bakarat, koumoligan om pangahakan Allah SWT,” ka disio kawagu.
Minomupus pason dau, Tun Musa om sawo Toh Puan Faridah Tussin minomodu’a mooi do Aidilfitri diti aramit miampai aramai om kirati potilombus dino kopoinggirot lukug pogiobpinoian om monginggirot pisompuruan rayat do oinsanan.
