Dr. Joachim (tanga’) pinapatahak tutungkap Bontugan pinialaan monsupu’ logo Kinouliton toun ko-40 PBS, Danny Majingga om sinasi’ di Julita.
KOTA KINABALU: Ponowoli Presiden Parti Bersatu Sabah (PBS), Datuk Seri Dr. Joachim Gunsalam pinoposotol do Pomilian Agayo Pogun ko-17 (PRN17) i pikikiro pohoroon do soiraira’ timpu toun diti nopo nga’ iso’ timpu oponsol montok papatantu’ Sabah kotilombus id nimpohon pulitik di aadang om ogirot.
“Posodiaan monoguang PRN ko-17 nopo nga’ iso’ timpu oponsol id kopotontuan Sabah kotilombus id nimpohon pulitik di aadang om ogirot.
“PBS miampai ginaras om nawawaya’an di pasanganu, angkab montok momusus turu’ timpohon i nalantoi pogulu diti om nogi’ poinsodia’ montok popoinggayo kuasa’ dau miampai kalantoi lobi kogumu’ timpohon id PRN obontol.
“Sabaagi parti i mongobi’ oinsanan tinaru, PBS otumbayaan do ginaras kinopogisusuaian diti kosili impohon kumaa kalantaion di lobi kagayo,” ka disio ontok minoboros id kinapamaramaian kinouliton toun ko-40 PBS id Hakka Hall, Tanjung Lipat, do hiti di kosodop.
Dr. Joachim nga’ pinoposotol nogi’ do pibarasan lobi osorisid om aadas maan pohoroo’, kosuul no id haal pogiikidan timpohon pialatan komponen Gabungan Rakyat Sabah (GRS).
“Palan osorisid diti kapatantu’ aiso’ kopogisisimbahan toi pogiuriasan undi i kapanahak koundaran kumaa parti ponokisahap. Lobi po koponsol, GRS nuru’ monginggirot nindikohon dau sabaagi popoburu’ tongo’ kopotutan rayat Sabah, miampai tumanding bobos ginumu’ timpohon om mongilag kotoisaan tongo’ parti labus i pikikiro doti’ do amu’ karati angkab otopot rayat pogun diti,” ka disio kawagu.
Iso’ mantad tingkananon kopio id posodiaan PRN diti nopo papatantu’ pisokodungan nayatan tongo’ parti id GRS kotilombus ogirot om agaras, ka di Dr. Joachim i otumbayan do piupakatan saalom oponsol kopio montok monoguang kaantaban labus.
“Yati’ id PBS otumbayaan do GRS kaanu monimporon pisompuruan om mongilag nunu-nunu pigogutan saalom, om potilombus dino kalantoi lobi kogumu’ timpohon i ponongkialaan. Iti okon nopo ko’ kapatantu’ kaadangon pulitik, nga kapanahak kosiwatan bobos osonong montok popohunung koinsanai kolomogon i nawaya’an pulitik Sabah solinaid diti,” ka disio pinopointalang.
Pinosotol disio do PBS sabaagi iso’ tukod ogirot GRS, tumilombus poinggirot id prinsip kopoburuan kopotutan rayat Sabah om manamong koponsolon pogun diti.
“PRN17 kosili koiyonon i kapatantu’ timpu dumontol Sabah, om miampai posodiaan di osorisid nogi’ karalano’ di ogirot, yati’ id sunsuyon di kohunung montok popoguli’ kawagu kaadangon om komogoton i imnaon do oinsanan rayat Sabah,” ka disio.
Miampai posodiaan opidot om karalano’ pulitik ogirot, PBS otumbayaan do GRS kotilombus kaanu sokodung rayat om koposiau Sabah kumaa timpu dumontol lobi kanawau.
