Hajiji guminambar miampai di Liew, tongo’ nangaalap suai om mogigiyon i tuminindapou id Ramai Pamaramaian Toun Wagu Sina 2025 Miampai Sakag Merotai.
TAWAU: Gabungan Rakyat Sabah (GRS) momorikot montok maganu koinsanai tindikohon Lintuhun Undangan Pogun (DUN) id Parlimen Tawau om Kalabakan ontok Pomilian Agayo Pogun Ko-17 (PRN17) diti.
Boyoon Montiri, Datuk Seri Haji Hajiji Haji Noor minoboros, mogigiyon id goguduo Parlimen dilo’ nuru’ monokodung piomungan dilo’ montok papatantu’ aiso’ watas DUN i oiduanan mantad kopongobian mobi’ rayat diolo’.
Minoboros isio, koporintaan GRS-Pakatan Harapan (PH) Plus buruanon dau kiharo sondikoton di atalang om ababayan agayo montok popoburu’ Sabah, kaampai no id Tawau om Kalabakan montok koundaran mogigiyon pogun diti.
“Id PRN do orikot mositi’ mongundi’ GRS tu’ ogumu’ naangayan i naanu tokou pinopowonsoi po’ompus apat toun minomorinta’ pogun diti nung piadangon di koporintaan pogulu diti.
“Mantad dilo’ pokionuon ku mogigiyon id DUN Merotai om watsa DUN suai id Kalabakan nogi’ Tawau papatantu’ oinsanan DUN do hiti alantoi GRS.
“Haro ababayan tokou di agayo montok Sabah, haro sondikoton tokou, nung piadangon di koporintaan pogulu diti i aiso’ sondikoton, mongudut om mimponondos nopo do hiti hilo’,” ka disio.
Isio po nogi’ Ponorikohon GRS minoboros dilo’ ontok pamaramaian Toun Wagu Sina Miampai Sakag Merotai pinaanjur Parti Harapan Rakyat Sabah (PHRS) id Lintuhun Poingukab Dato Sri Najib, Merotai, doros hiti di tadau baino’.
Nokotindapou nogi’ i Presiden PHRS, Brig. Jen. (B) Tan Sri Liew Yun Fah; Monunurat Koporintaan Pogun, Datuk Seri Sr. Safar Untong; Puru Parlimen Tawau, Datuk Lo Su Fui; Puru Parlimen Kalabakan, Datuk Andi Muhammad Suryadi Bandy; Puru Lintuhun Undangan Pogun (ADUN) Kukusan, Datuk Rina Jamal om ADUN balung, Datuk Hamild Awang.
Hajiji minanahak jominan GRS tumilombus monuridong koporintaan pogun katalib PRN17 obontol nosusuhut naangayan dilo’ id kinopogowitan kosimbanon id pogun diti katalib lobi apat toun minomorinta’.
Kohondot dilo’, mokianu isio oinsanan watas DUN kaampai Merotai obian mobi’ rayat koporintaan mooi do inggisaman mogowit koburuon id koiyonon dilo’ lobi koindalan oturundus.
“Mositi’ tokou kalantoi do hiti, pomogoton Merotai. Okon ko’ mimboros tokou nopo tomod do aiso’ suang, haro sondikoton tokou,” ka disio.
Daamot dilo’, Boyoon Montiri nga’ minanahak jominan kohondot kobolingkahangan pangaba’ waig aanu manalasai do toun diti soira’ koinsanai karaja’ koponginsonongan koindalan.
“Kobolingkahangan waig manahak oku jominan do aanu tokou manalasai do toun diti. Haro kousinan, loji waig insonongan tokou om undaron.
“Ingkaa po nogi’ kobolingkahangan paip noposu, undaron tokou, mantad dilo’ kobolingkahangan waig diti asalasai do toun diti nogi’ tu’ yati’ haro palan, haro inggisaman, okon ko’ boros-boros tomod.
“Nung mimboros do aiso’ suang miagal pembangkang opurimanan ku do amu’ tokou nuru’ onuan kopomodulianan. Yolo’ amu’ kaanu popowonsoi do nunu-nunu, nonuan tokou no yolo’ do kosiwatan, nga’ nunu i winonsoi diolo’.
“Yolo’ (pembangkang) kaagal tin kusung, oiyang tuni soira’ tuntungon. Nga’ apat toun tokou minomorinta’ ogumu’ no i nosigampot,” ka disio.
Id boboroson disio, Hajiji pinapahabar nogi’ kinopolulusan upalai Tana’ Kokompungan Iban, Merotai Besar om Kampung Melati Burut montok pohimogonon sabaagi rizab kokompungan.
Suai dilo’, pinahabar nogi’ disio kinolulusan Kapamasanangan Sumbu Solar Ralan Magayo mantad Jambatan Putih gisom Sungai Udin, Merotai miampai kinopoobian RM1.9 riong i kodokot bobos alaid do wulan Kaapat toi Kolimo 2025.
Boyoon Montiri pinapahabar nogi’ kopongukaban Kakadayan Wagu Merotai id Kijang Point i kopoiyon 100 unit walai duo pitimpak om 16 unit kadai i nopongo no minomowonsoi do Kotinanan Koburuon Pomuwalaian om Kakadayan (LPPB) nogi’ Perkara Realty.
Hajiji pinapahabar nogi’ ponuridongan songinan lintuhun montok Merotai miampai kopoobian RM2 riong.
Id ramai dilo’, pinapatahak nogi’ isio surat kopouyuhan tana’ mantad Koupisan Tana’ om Monunurat kuminaa 42 mamaramit mantad Kampung Iban, Merotai.
Nokopogulu, suminiwat i Hajiji kuminakap di Luguan Parti Gagasan Rakyat Sabah (Gagasan Rakyat) Bohogian Sri Tanjong, Datuk Haji Naim Haji Ahmat i sumakit id kinoiyonon disio doid Taman Ria, do hiti.
