Dr. Joachim (tanga’) guminambar miampai dilo wookon nakatanud Kotombuluyan Kembara PBT Kounsol Watas Kuala Penyu.
BEAUFORT: Komontirian Koporintaan Koiyonon om Pomuwalaian (KKTP) minomonsoi koponuridongan nogi’ koponguludan kumaa oinsanan ‘ordinan’ poinhompit, kaampai kooturan pomogunaan premis (Use of Presmises by-law).
Kumoduo Boyoon Montiri II po nogi’ Montiri KKTP, Datuk Seri Dr. Joachim Gunsalam minoboros, kopoindalanan kooturan wagu dilo’ poingkuro po nasansagan popourut.
Dr. Joachim (tanga’) guminambar pongingitanan miampai tombului apantang nogi’ oinsanan nokotindapou id Kotombuluyan Kembara PBT Kounsol Watas Sipitang.
Pinointalang disio, rontob pambayaran pogulu diti adalaan kosiriba’, naamot kinoingkawason katalib pinogintongan kawagu noilaan do nokosimbuat.
“Mantad dilo’, nasansagan oku mokinau diolo’ do popoinrulan kopoindalanan. Oinsanan bohogian kikuasa’ nokoiyonon (PBT) nuru’ papaharo ababayan kopohompitan pitorinaan miampai mongingigit tonggungan lobi kopogulu,” ka disio ontok Kotombuluyan Kembara Bohogian Kikuasa’ Nokoiyonon (PBT) id Sipitang, Beaufort om Kuala Penyu.
Dr. Joachim (poindikau kaapat, wanan) guminambar pongingitanan miampai tombului apantang om sitaf Kounsol Watas Beaufort kopihondot Kotombuluyan Kembara PBT dilo’.
Ka disio, koponguludan kousinan nopo nga’ iso’ mantad kaantaban agayo i otoguang do kogumuan PBT.
Suai dilo’, pinosotol nogi’ disio koponsolon papaharo kapakarajaan wagu id tikid PBT.
“Bohogian Komontirian monguhup poinggisom. Nung PBT kiharo kousinan di ogirot, kaanu yolo’ momoruhang kopogonuan sitaf,” ka disio kawagu.
Dr. Joachim suminain plak Linimput Inovatif om Kreatif (KIK) katalib pinapaharo mitingan Kotombuluyan Kembara PBT Kounsol Watas Beaufort.
Kotombuluyan Kembara diti kihontolon mintutun lobi kosomok tikid PBT id Sabah, suai ko’ mogintong kohimpogongan, kobolingkahangan ngaawi’ di potoguang diolo’ id kapatahakan surupukaraja’ bobos osonong kumaa mogigiyon.
“Ounsikou oku tu’ maya’ kotombuluyan diti, pipiro kobolingkahangan naanu minongintutun om nopogihuman panalasaian montok PBT di notombului. Kotombuluyan diti tilombuson gisom oinsanan PBT opongo monombului.
Dr. Joachim (tanga’) guminambar pongingitanan miampai dii Isnin (kaapat, gibang), Dr. Jamili (kaapat, wanan) nogi’ ilo suai ontok pinapaharo kotombuluyan kuminaa Linimput Tinimungan Inovatif om Kreatif (KIK).
“Suai dilo’, kotombuluyan diti kouhup komontirian id pamalanan toun tiso’ karait kopoindalanan id nayatan komontirian,” ka disio po nogi’ Puru Lintuhun Undangan Pogun (ADUN) Kundasang.
Nokotindapou nogi’ id Kotombuluyan Kembara diti i ADUN Sindumin, Datuk Dr. Yusof Yacob; ADUN Kuala Penyu, Datuk Limus Jury; ADUN Klias, Datuk Isnin Haji Aliasnih; Monunurat Pointatap komontirian, Datuk Dr. Jamili Nais om i Kumoduo Monunurat Pointatap I, Tpr. Stanley Chong.
