Joniston Bangkuai
KOTA KINABALU: Kootusan Kabinet Pisompuruan montok minanatak atag buris puralan montok tulun Islam i tumindapou ababayan id koiyonon ibadat okon Islam nopo iso’ kootusan di kohunung om apatut, ka di Lansanon Gabungan Rakyat Sabah (GRS).
Luguan Kopointalangan dilo’, Datuk Joniston Bangkuai minoboros, kootusan dilo’ kopokito do Koporintaan Perpaduan Pisompuruan minaganu kokiraan kopurimanan mogigiyon karait haal tinaru om kougamaan.
“Tumanud di nabasa’ id media, ilo’ nopo nga’ iso’ atag no, om karati yahai do pibarasan kakal poinpanau.
“Nga’ id Sabah, toririmo tokou mananud sunduan piuludan, kopurimanan mamantang om pirotian di olumis id nayatan oinsanan mogigiyon.
“Kinolumison id Sabah om Sarawak, hinombo pogitimbangan tinaru om ugama’ toririmo id rontob bobos akawas, nuru’ do okunan,” ka disio id iso’ kointalangan di tadau baino’.
Joniston po nogi’ Luguan Kopointalangan Parti Bersatu Sabah (PBS) minoboros, noilaan no do ginumuan do koporintaan Sabah mangakun Islam sabaagi ugama’ pinotomod Malaysia, nga’ id nayatan pogun, kogunoon tinan kougamaan okon Islam amu’ toliban.
“Sabaagi poombitanan, toun diti koporintaan Sabah pinopoobi’ soginumu’ RM70 riong kumaa tinan kougamaan okon Islam, kinoingkawason soginumu’ RM13.25 riong nung piadangon kopoobian toun 2024 soginumu’ RM56.75 riong.
“Miagal di asaru’ posotolon di Boyoon Montiri, Datuk Seri Haji Hajiji Haji Noor, koporintaan pogun pointopot om miampai poinggirot popoindalan katatapan kaadangon om kaadason id oinsanan sunduk montok monguhup mogigiyon, amu’ momuntuk tinaru toi ugama’, montok no momogompi’ piuludan id mogigiyon.
“Kotinanan Ponombuluyan Sabah (STB) o kosuul no popointutun pisompuruan maya’ ababayan miagal ‘Harmony Walk/Run, i kopohompit kotombuluyan kumaa koiyonon ngaawi’ ibadat miagal Masjid Pogun, Gereja Secred Heart, Kuli Sikh Gurduwala om Kuil Budha Peak Nam tung id dodoros, montok popokito kinohoroon aagal miampai oulud id mogigiyon orukut id Sabah.
“Pibarasan poingukab om pogipapantangan kotumbayaan sompipi’ tiso’ om tiso’ toririmo nosili puralan id pogilumaagan tokou,” ka di Ponorikohon STB dilo’.
Minoboros isio, ponginsomokan Sabah toririmo poposotol pisompuruan maya’ pogipapantangan, okon i ko’ maya’ buris puralan di opidot.
“Otumbayaan yahai mogigiyon orukut ugama’ om tinaru id Sabah kotilombus mogiromut id tiso’ om tiso’ miampai rlaan di koponimporon koyuon kopogiagalan tokou.”
