Jahid om lalansanon mogigiyon i nokotindapou guminambar pongingitanan miampai susumikul Tadika Ceria Kadazandusun Tiong Monggis.
TAMPARULI: Balajaran osopung i mimpau do koyuon koubasanan om boros nokoiyonon nopo nga’ tontiil kumaa koburuon mogigiyon labus kakadayan di komogot om kiginoris tumopong.
Kohondot dilo’, inggisaman Tadika Ceria Kadazandusun Kampung Tiong Monggis id koponudukan tangaanak labus kakadayan do mintutun om mongupus boros nogi’ koubasanan mimpuun mantad okoro’, unsikohon kopio.
Montiri Koburuon Labus Kakadayan, Datuk Jahid Jahim minoboros, boros sandad nopo nga’ gamut kumaa kointutunan diolo’ sabaagi mogigiyon Kadazandusun.
“Boros okon i ko’ kakamot nopo piromutan, nga’ tungkusan koubasanan i kiguno gompion om potungkusan kumaa sinakagon dumontol,” ka disio.
Minoboros isio dilo’ ontok pinopoimagon TAdau Kapanahakan Sijil om Titungkap Tadika Ceria Kadazandusun Tiong Monggis, Tenghilan, doros hiti, di tadau baino’.
Nokotindapou nogi’ i Monunurat Pulitik kumaa Montiri Koburuon Labus Kakadayan, Jilias Lintar; Luguan Tanak Mamasok Pogun (KAN), Selvis Gambar; Molohingon Mongingia’ Sikul Tadika Ceria Kadazandusun Tiong Monggis, Chrisnelia Asing om lansanon mogigiyon id pososorili’ Tenghilan.
Ka di Jahid, tonggungan papabantug boros sandad okon i ko’ id lihawa nopo tongo’ mongingia’, nga nogi’ molohing.
“Inggisaman diti nuru’ mimpuun mantad walai, hinombo tangaanak okoro’ miagal do kain opurak, nunu i powotikon id umur diti kosili impohon kumaa koponuridongan ginirot kinoulunon diolo’.”
Kohondot dilo’, isio po nogi’ Kumoduo Presiden Koisaan Koubasanan KadazanDusun Sabah (KDCA) minokianu oinsanan molohing do amu’ tumingkod monuduk boros sandad kumaa tangaanak diolo’.
“Tangganak tokou nopo nga’ timpu dumontol dati’. Miampai kapangahakan di kohunung, kosili yolo’ do lalansanon i koowit do Tamparuli om Sabah kumaa kotundaon i amu’ momolihu gamut koubasanan diolo’.
“Otumbayaan oku, miampai tonggungan oinsanan bohogian, kaanu tokou papatantu’ boros om koubasanan Kadazandusun kotilombus apasi om koinggayo,” ka disio.
Limo susumikul nakaramit setifikit nokopupus sinikulan id tadika dilo’ di toun nakatalib.
Id ababayan miagal, Jahid pinopolulus nogi’ koponguhupan tongkisus om kogunoon monumin koiyonon taman pogigianakan tangaanak id sikul dilo’.
Kapt:
