Dr. Joachim (tanga’, id tohuri) guminambar miampai mongongobi’ mantad GoNet om Perbadanan Ponguludan Taman Bakti Ikhlas I pinopokito memorandum pihunungan sopipoopori.
KOTA KINABALU: Kopoindalanan pendigitalan e-Invois om e-Pembayaran montok mongingkawas kopulokison kopoindalanan karaja’ id kondominium, apartment om flat nopo nga’ laang poinsogulu di kosudong, ka di Kumoduo Boyoon Montiri II, Datuk Seri Dr. Joachim Gunsalam.
Minanangkabayahan nogi’ isio kumaa kotinanan om korporat miagal do Taylor Hobbs, Ponorikohon Kotinanan Potunud Sikul Akawas Kota Kinabalu (KKHS), Perbadanan Ponguludan Taman Bakti Ikhlas om Perbadanan Ponguludan Beverly Hills Plaza ‘B’ i nosili tambalut piindopuan wagu om tambalut piindopuan di nakaampai no do GoNet.
“Pisokodungan diti nopo nga’ iso’ poombitanan bobos osonong poingkuro siktor swasta kaanu miuhup montok mogowit kosimbanon osonong. Kalansanan ku lobi kogumu’ bohogian gumompit id kopoindalanan pendigitalan miagal diti,” ka disio.
Dr. Joachim nga’ minamarayou GoNet, songinan komponi nokoiyonon Sabah i nokoindalan lobi tolu toun om kiharo lisin e-Dompet i pitamangan do Bank Negara Malaysia.
“Miampai nawawayaan GoNet, otumbayaan oku aplikasi diti kotilombus kopouyu mogisusuai kogogonopan digital id pompod tunturu’ moomoguno do timpu dumontol,” ka disio.
Isio po nogi’ Montiri Koporintaan Koiyonon om Pomuwalaian minoboros dilo’ ontok suminasi’ Ababayan Suminain Memorandum Pihunungan om Pibatosan Surupukaraja’ miampai tambalut ponoki’ilang wagu nogi’ pinopoimagon kinopoimpuunan sistem e-Invois maya’ aplikasi GoNet do hiti, di tadau baino’.
Dr. Joachim pinopointalang nogi’ do mimpuun ko 1tw Koturu’ 2025, koporintaan popoindalan poinponu’ pomogunaan e-Invois montok monowoli dokumen karatas om elektronik miagal format PDF, JPEG om DOC. Inggisaman diti pasarabakon kum oinsanan ‘transaksi’ id pialatan papadagang om momomoli, kaampai koponguludan harata.
“Kopoindalanan e-Invois kopongingkawas kopulokison om kopoturundus kopoindalanan pongindopuan mamamayar sukai, suai ko’ mongingkawas rontob kotidukuan sukai,” ka disio.
Pinoulud nogi’ disio pipiro koundaran agayo e-invois, ilo’ nopo nga’ mongingkuri’ kopoindalanan ‘manual’ om kosilapan; monginsanang popotoguang foom ‘nyata’; mongingkawas kopulokison karaja’; om popodigital koporuputan ‘percukaian’ om kousinan.
“Tiknologi doun kaawagu nopo diti nga’ laang ponimpuunan kumaa kosimbanon agayo montok pogun tokou. Rayat karamit surupukaraja’ di lobi kopulokis, nogi’ kopogkikitan timpu om balanja’,” ka disio.
Dr. Joachim nga’ otumbayaan do inggisaman diti kosili pongunsub kumaa lobi kogumu’ ‘inovasi’ do timpu obontol, kopokito do Sabah kaanu rumompok di tongo’ pogun suai id timpu ‘globalisasi’.
“Otumbayaan oku piuhupan oinsanan bohogian koowit koundaran agayo kumaa dati’ toinsanan, monuridong timpu dumontol di lobi ‘pintar’, ‘lestari’ om ‘inovatif’,” ka disio.
Nokotindapou nogi’ Minonuridong po nogi’ Potunud Kopoindalanan om Potundu GoNet Group, Dr. James Yong Chau Leong; Potunud GoNet Group DAtin Evelyn Anak John Ganjos; Momorunding Agayo Taylor Hobbs, Sr. Liaw Lam Thye; Ponorikohon Ponorikohon Kotinanan KKHS, Ben Lim Kiat Kong; Ponorikohon Perbadanan Ponguludan Taman Bakti Ikhlas, Jessel Kamijan @ Jessel Aloysius; Presiden Perbadanan Ponguludan Beverly Hills Plaza ‘B’, Alice Chong Ming Fung.
