Joniston Bangkuai
KOTA KINABALU: Aiso’ pinibabarasan toi kootusan pohimagon id Gabungan Rakyat Sabah (GRS) toi Parti Bersatu Sabah (PBS) karait atag mooi do Parti Warisan sumompuru piomungan dilo’.
Luguan Kopointalangan GRS, Datuk Joniston Bangkuai pinopointalang do atag montok magalap Warisan sumompuru GRS mantad di tulun atantu’ om amu’ kopokito ningkakaton pohimagon piomungan dilo’.
Minoboros isio dilo’ montok simbar kumaa ponguhotan mantad media om mononokodung GRS, lolobi mantad PBS, i mokimoilo kopio ningkakaton piomungan dilo’ nosusuhut kointalangan kaawagu diti karait haal dilo’.
Joniston pinoposotol do sundung GRS mamaramit osonong pomusarahan montok popisompuru parti ngaawi’ nokoiyonon montok koundaran Sabah, nga’ oponsol do sorohon do haro koindalanon i kiguno suhuton, om haal diti amu’ po nopibabarasan toi notontuan miampai pohimagon id parti toi piomungan dilo’.
“Iti nopo nga’ pomusarahan nopo di pinolombus do wookon tulun, nga’ amu’ po noowit kumaa mija pibabarasan kopomuruanan GRS toi PBS,” ka di Joniston, i po nogi’ Luguan Kopointalangan PBS, id kointalangan di tadau baino’.
“Mongunsikou yahai kororohian montok monginggirot pulitik Sabah, nga’ mongunsub yahai di mononokodung om tulun ginumuan do amu’ momonsoi kotontuan tumanud pomusarahan minsosongulun,” ka disio kawagu.
Atag mooi do Warisan sumompuru GRS nokoimbulai soira’ di Presiden dilo’, Datuk Seri Mohd. Shafie Apdal, pinoruput minonondos do GRS impiipiro no pagada’ kopouyuhan montok misokodung dumontol pomilian agayo pogun di obontol.
Sabaagi simbar, Luguan Komulakan PBS, Christopher Mandut minangatag mooi do Warisan mongupalai montok sumompuru GRS, om Kounsol Akawas piomungan dilo’ mogiboboros do upalai dilo’.
Christopher nga’ pinoposotol nogi’ do koponompuruan tongo’ parti nokoiyonon kapanahak koundaran kumaa Sabah, gigisom po do oinsanan bohogian poposuul pisompuruan ko’ mantad pisuayan.
