Stanis (rulud kumoiso’, poindikau kaapat wanan) guminambar pongingitanan miampai oinsanan puru paganakan PAJAK.
TENOM: Ababayan Tadau Paganakan pinaanjur do sinakagon ‘Papag Ri Aki Jamangki am Aru Kambiton’ (PAJAK) nokoindalan miampai aramai di konihab (28tw Kohopod om Duo) id Longkod Koubasanan Murut, Tenom.
Ababayan diti kituduan popogirot pogiromutan piobpinoinan id nayatan puru paganakan i noondo diti nokosigampot do limo sinakagon.
Ponorikohon Manganganjur PAJAK, Stanis Buandi po nogi’ Kumoduo Ponorikohon Kotinanan Koubasanan Pogun Sabah minoboros, ababayan diti pinaanjur montok monginggirot sunduan piobpinoian id nayatan puru paganakan asapou dilo’.
Stanis (tanga’) pinopoindalan kinopomutulan kek miampai mobi mantad sakag PAJAK om nogi’ puru puruankuasa’ manganganjur karamaian.
Mogisusuai kaparagatan koimbayat pinoindalan po’ompus kararamaian, wookon nopo pokikitanan suminding, pialaan sipoot raramai om minogiolon-olon tutungkap.
Stanis pinopolombus nogi’ kalansanan mooi lobi kogumu’ puru paganakan mantad sinakagon diti i kopongingit karaja’ oponsol id koporintaan om manahak kouhupan kumaa mogigiyon.
Isio po nogi’ Puru Kounsol Akawas (AMT) Parti Bersatu Sabah (PBS), minonongkounsikou kumaa oinsanan i nakaampai pinapalantoi ababayan diti.
Ababayan dilo’ osonong kinoindadalano’ miampai kinorikotan soginumu’ 200 tulun puru paganakan.
“Kalansanan ku mooi do nunu nopo pogiuriasan id nayatan paganakan agayo diti aanu mongilag montok no kopogiupakatan toinsanan. I bobos oponsol, kiguno tokou mogi’intutun-tutun om mamagatang piromutan piobpinoian, lolobi no kopio tu’ komolohingan tokou aiso’ nodi,” ka di Stanis.
Tadau Paganakan PAJAK nopo diti nga’ i kumoinduo poonjuro’ pointonod dilo’ nakaanjur montok kumoinsan di toun 2020 id Beringgis Beach Resort & SPA, Papar.
Ababyan diti kapaampai wookon om kinotungkusan mantad puru paganakan agayo sinakagon Aki Singgon i pinapaharo tadau paganakan di toun 2017.
