Dr. Jeffrey (gibang) om i Dr. Joachim (koduo, gibang) guminambar miampai di Presiden Parti Cinta Sabah (PCS), Tan Sri Anifah Aman; sawo di Dr. Joachim, Datin Seri Linda Ewit; sawo di Dr. Jeffrey, Datin Seri Cecelia Edwin Kitingan om i Datuk Joanna Kitingan.
KOTA KINABALU: Somok 10,000 tombului ruminubpu’ doid Ramai Walai Poingukab Krismas piniuhupan manganjur do Parti Bersatu Sabah (PBS) om Parti Solidariti Tanah Airku (STARSABAH) i pinaanjur doid Lintuhun Hongkod Koisaan (KDCA) do hiti, konihab.
Ramai diti komoyon do kisusuyan kahandaman tu’ kumoinsan nogi’ duo parti pulitik miniamung pinapaanjur ababayan dilo’, kopokito sunduan pisompuruan id pialatan PBS om STARSABAH.
Ponowoli Presiden PBS i po nogi’ Kumoduo Boyoon Montiri II, Datuk Dr. Joachim Gunsalam minongomi pisokodungan diti sabaagi kokitanan pisompuruan ogirot pialatan goduduo parti.
“Kosuaion do toun diti nopo kapamaramaian winonsoi miampai STARSABAH. Ounsikou oku kopio di raramit id labus kinoubasanan diti om lumansan kopokito ilo’ sokodung tulun ginumuan kumaa piomungan PBS om STARSABAH,” ka di Dr. Joachim.
Minamason nogi’ isio kounsikohan Krismas kumaa oinsanan rayat Sabah om minokianu toinsanan do mamaramai kararamaian dilo’ miampai poinponu’ piuludan.
Suai dilo’, minamason isio mogigiyon mooi lobi mingat-ingat soira’ id talun-alun dumontol toun wagu om mongilag papamanau soira’ magawuk.
Presiden STARSABAH, Datuk Dr. Jeffrey Kitingan nga’ minaganu kosiwatan minamason kounsikahan Tadau Krismas om Toun Wagu 2025 kumaa oinsanan tombului.
“Noundaran tokou id Sabah tu’ kaanu mamaramai mogisusuai kararamaian toinsanan. Iti no kinolumison om kosuulon tokou sabaagi rayat Sabah,” ka disio.
Pinoposotol nogi’ isio do koponsolon sunduan paganakan om pisompuruan id mogigiyon, kaampai id nayatan pulitik.
Id kinoburuon pulitik, Dr. Joachim pinoposotol do PBS tumilombus miampai Gabungan Rakyat Sabah (GRS) sundung nunu nopo aantakan.
“Tumanud kooturan PBS, insan tokou ponuridong piomungan, tumilombus tokou miampai GRS,” ka disio.
Rinoitan nogi’ disio o kosimbanon kopomuruanan id parti soira’ di Datuk Seri Dr. Maximus Ongkili pinapatahak ‘baton’ kopomuruanan kuminaa disio. Nga’, pomilian poinbida’ maan potontuo’ id kongres di pikikiro kapanau wulan Kohopod toun tiso’.
“Sabab o do toun obontol nopo nga’ toun Pomilian Agayo Pogun, pinourut tokou pomilian parti montok moningkanan kumaa posodiaan pomilian agayo,” ka disio kawagu.
Ramai Walai Poingukab Krismas diti nosili koiyonon oponsol id kopoinggirotan piromutan mogigiyon mogisusuai nantadon nogi’ kopokito tonggungan goduduo parti id kopogowitan psiompuruan kumaa rayat Sabah.
