Hajiji om lansanon Gagasan Rakyat suai guminambar pongingitanan miampai 15 susumikul mantad Longkod Panamangan Woori Jib St. Francis Xavier Kampung Potuki.
KOTA KINABALU: Karamaian Krismas om Toun Wagu Sina’ nayatan pogun maan poindalano’ miampai poinbida’ do Koporintaan Pogun mimpuun toun diti.
Boyoon Montiri, Datuk Seri Haji Hajiji Haji Noor minoboros, iti nopo nga’ kumoinsan nogi’ do koporintaan pogun minonowoli kopongonjuran karamaian dilo’, i pogulu diti amu’ insan powonsoiyo’.
“Mimpuun toun diti, di wulan Koduo nakatalib, minonimpuun tokou kapamaramaian Toun Wagu Sina’ miampai pinotomod id nayatan pgoun, i pinaanjur do koporintaan.
“Ingkaa nogi’ kaparamaian Krismas do toun diti, i pinaanjur do Dewan Bandaraya Kota Kinabalu (DBKK). Nga’, montok karamaian Krismas toun tiso’, pinatantu’ tokou mooi do ramaiyon ilo’ id nayatan pgoun, om kopongonjuran dilo’ ponorikohon di Montiri Komulakan om Sipoot Sabah, Datuk Ellron Angin,” ka disio.
Minoboros isio dilo’ id Ramai Makan Doungadau Miampai Presiden Parti Gagasan Rakyat Sabah (Gagasan Rakyat) kopihondot Krismas, do hiti, di konihab.
Minongomi kotilombus, Hajiji po nogi’ Presiden Gagasan Rakyat pinopointalang do kopoindalanan pamaramaian dilo’ do koporintaan pogun kituduan montok monginggirot sunduan pogipapatangan om mamaramai kopogisusuaian koubasanan nogi’ karamaian agayo mogigiyon id Sabah.
“Montok dati’, mamaramai kopogisusuaian diti nopo nga’ iso’ haal di kirati kopio. Nosili ilo’ do nubasanan tungkusan di komolohingan dati’, i toririmo mamantang om mamaramai kararamaian sompoopori.
“Kiguno tokou tumilombus mongimbulai mogigiyon orukut tinaru diti id koyuon di oulud, lolobi no ontok mamaramai karamaian kougamaan sompoopori.
“Iti no angkab i orohian owiton do koporintaan Gabungan Rakyat Sabah, ilo’ nopo nga’ manahak ponompuanan di aadang om aadas kumaa oinsanan mogigiyon Sabah amu’ monimud pisuayan ugama’, tinaru om sinakagon.
“Kalansanan ku, kopihondot Krismas om Toun Wagu diti, kaanu tokou monginggirot po do piobpinoian, pisompuruan om piuludan id nayatan mogigiyon tokou,” ka di Hajiji i po nogi’ Ponorikohon GRS.
