Haji Hajiji Haji Noor
KOTA KINABALU: Gabungan Rakyat Sabah (GRS) minanahak kopokitanan montok tumilombus miuhup miampai Pakatan Harapan (PH) Sabah id koponoguangan Pomilian Agayo Pogun Sabah Ko-17 (PRN17).
Ponorikohon GRS, Datuk Seri Haji Hajiji Haji Noor minoboros, haal dilo’ pinoilo kuminaa di Luguan Montiri, Datuk Seri Anwar Ibrahim.
“Intangan tokou, nung osonong pomusarahan diolo’, amu’ kadala’, timbangon tokou piuhupan diti. I nopo oponsol montok doho’ nga’ pisompuruan, ilo’ pogi’ do mimang oku papatantu’ koundaran montok toinsanan.
“Yoho’ nosili Boyoon Montiri montok papatantu’ pisompuruan. Ilo’ pogi’, tinuridong GRS miampai walu’ parti komponen, kaampai parti okoro’ i pikikiro doti’ do amu’ nakalantoi id PRN di nakatalib. Nga’, angkab ku nopo montok popisompuru koinsanai,” ka disio.
Minoboros isio dilo’ id Ramai Makan Doungadau Miampai Presiden Parti Gagasan Rakyat Sabah (Gagasan Rakyat) kopihondot Tadau Krismas, do hiti, konihab.
Hajiji po nogi’ Presiden Parti GRS minoboros nogi’ do pinoilo nogi’ disio nindikohon ogirot GRS id koponoguangan PRN do dumontol kuminaa di Kumoduo Luguan Montiri, Datuk Seri Ahmad Zahid Hamidi.
“Otumbayaan yahai GRS kotilombus karamit sokodung rayat id PRN obontol,” ka disio.
Id boboroson disio, pinokianu nogi’ di Hajiji oinsanan puru parti do popironit nuludan, monginggirot pisompuruan om moningkanan posodiaan monoguang PRN.
“Timpu koporintaan diti opupusan do wulan Kohopod. Iti kirati kaanu tokou mongunggar Lintuhun Undangan Pogun (DUN) pogulu toi ontok timpu dilo’,” ka disio pinopointalang.
