Haji Hajiji Haji Noor
KOTA KINABALU: Koporintaan Sabah popoobi’ soginumu’ RM70 riong ilo’ nopo nga’ kinoingkawason soginumu’ RM13.25 riong montok kapanahakan ponguhupan kumaa tongo’ tinan kougamaan okon Islam, sikul ngaawi’ Mission om mimpoopori id pogun diti do toun 2025, ka di Boyoon Montiri, Datuk Seri Haji Hajiji Haji Noor.
Minoboros isio, kopoobian do toun tiso’ nokoinsawat nung piadangon di toun 2024 ilo’ nopo soginumu’ RM56.75 riong.
Kalansanan disio ponguhupan dilo’ koponginggaan tonggungan kousinan bohogian sikul om tongo’ tinan kougamaan di poinhompit id inggisaman papatantu’ kogogonopan toririmo id koyuon di koposimbayan, oumolig om osinggawa’.
“Koporintaan pogun tumopot om toririmo popoindalan kooturan kaadangon om kaadason id oinsanan haal montok monguhup mogigiyon amu’ momuntuk tinaru om ugama montok no monilombus piuludan mogigiyon id pogun diti,” ka disio id Ramai Kinopoimaganan Pongukaban Pamaramaian Krismas Kota Kinabalu (KKCC) Toun 2024 id Padang Merdeka, do hiti, di totuong baino’.
Teks boboroson disio binasa di Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Takanon, Datuk Seri Dr. Jeffrey Kitingan.
Hajiji minagangat nogi’ oinsanan mogigiyon tumilombus momogompi’ kotoronongon, piuludan om pogihunungan i popuriman do mogigiyon mogisuai tinaru id Sabah om potilombus dino kosili ombitanan id pomogunon diti.
Pinokian nogi disio mogigiyon Sabah tumilombus mogilisi-lisi kumaa sompipi’ tulun gisom solilinaid.
Otopot nopo, piuudan id nayatan mogigiyon nopo nga’ posunduran kumaa kalantaion angkab Koporintaan Sabah Maju Jaya (SMJ).
“Otumbayaan oku pangaramaian Krismas diti i pohoroon solinaid apat tadau nopo nga’ posunduran kumaa pogihunungan om piuludan nayatan mogigiyon. Kalansanan ku oinsanan kaparagatan i poindalanon id po’ompus pamaramaian diti romiton om gunoon poinsonong kopio di oinsanan mogigiyon,” ka disio.
Hajiji minoboros, pamaramaian KKCC ko-19 toun diti i ki’uhu “Kasih Melalui Tindakan” (Love in Action) kohunung kopio kosuul no id pogun Sabah i kiharo mogigiyon mogisuai tinaru om ugama.
“Uhu dilo’ sokodungon tu’ ilo’ nopo kounsub dati’ do mogililisiu tiso’ om tiso’, okon nopo ko’ moboros karait lisiu nga papadalin om popokito lisiu dilo’ maya’ laang. Lisiu id nayatan mogigiyon mogisuai sinakagon, tinaru om ugama’ diti oponsol kopio montok kasasanangan, koburuon om kotoronongon Sabah di koupusan diti,” ka disio.
Hajiji minamarayou inggisaman om pogisokodungan mogisusuai nayatan mogigiyon id pogun diti i nokohompit id kinapamansaian ‘kalung manik’ winonsoi longon kopihondot pamaramaian dilo’. Pisokodungan diti kopokito ginirot pisompuruan id nayatan mogigiyon amu’ momuntuk tinaru om ugama.
“Kanou tokou toinsanan mogiuhup om gumaras kumaraja’ mooi do kotilombus pogun do koburu’.
“Kounsikahan mamaramai Tadau Krismas kumaa oinsanan mogigiyon Kristian om Kopisanangan Toun Wagu 2025 kumaa oinsanan mogigiyon pogun diti,” ka disio.
