Abqaree Fawwaz Abekan
KOTA KINABALU: Koyuon pulitik id Sabah i noyomutan di nubasanan monondos om popogiodu kotilombus nosili kohimpogong tagayo kumaa kogompitan sukod wagu id kaganaan pulirik, ka di Presiden Kounsol Komulakan Sabah (MBS), Abqaree Fawwaz Abekan.
Ka disio, koyuon dilo’ kapanahak nogi’ waya’ araat kumaa koburuon koungkalaton pulitik id nayatan mongungundi’ omulok doid pogun diti.
Abqaree minoboros, MBS nga’ pinopolombus nogi’ kotongoban di ‘skandal rasuah’ (koulalaho’ araat susuap) i kopohompit walu’ Puru Lintuhun Undangan Pogun (ADUN) Sabah i noondo diti nosili haal tiintangan.
MBS kokito kaantakan dilo’ sabaagi iso’ laang pulitik di amu’ olidas, lolobi no kumaa komulakan i masaan mogihum sondikoton id kaganaan pulitik, ka disio kawagu.
“Unsubon dahai tulun i nosili ‘whistleblower’ do tumigulai miampai katama’ om poporuput haal dilo’ kumaa Suruhanjaya Pongilagan Ponuapan Malaysia (SPRM) miagal di pinaatag di Boyoon Montiri Sabah, Datuk Seri Haji Hajiji Haji Noor.
“Laang poporuput kumaa media miampai amu’ tuminanud pawaya’an di poinhunung koponinong nopo koundorosian ginumuan om kopomidsala’ kasasangan mogigiyon, kosuul no komulakan i momoguno kopio kaadangon pulitik montok mimang buru’,” ka di Abqaree id kointalangan di tadau baino’.
MBS pinopolombus nogi’ sokodung ouli’ kumaa kopomuruanan Koporintaan Pogun id siriba’ di Hajiji om lumansan mooi do ababayan kopoburuan pogun, kaampai Bajet Sabah 2025, aanu popoindalan oturundus montok kasasanangan mogigiyon.
Suai dilo’, MBS mokianu di tongo’ lalansanon om komulakan om mongimuai om momuhondom kawagu sinusuyan pogun diti i asaru’ aantakan kogompitan longon bohogian labus.
Abqaree minoboros, Sabah i opuawang do intodonon sandad kiguno momoguno poingundar kosiwatan dilo’ montok koundaran mogigiyon dau miampai amu’ oburunsut id kokusutan pulitik di kopoimamang.
“Sabah nopo nga’ tana’ di noponu’ do kosiwatan. Amu’ tokou kasaga’ popologos tongo’ koyuyuon araat tumilombus kapanagak timpu dumontol pogun diti om komulakan dau,” ka disio kawagu.
Nangatan disio oinsanan bohogian do popo’iliu koponsolon pogun om mogigiyon Sabah id toguang montok no mamajamin timpu dumontol sukod wagu di lobi aadang om koburu’.
