Olivia Richard i nokito nokoidu’ pogun id kakadayan Andong, Watas Gyeongsang Utara, Korea Selatan di tadau Kotolu.
KOTA KINABALU: Kopusohon rayat Malaysia amu’ monimud tinaru om ugama’ id koponguhupan kousinan montok mogowit muli’ tinan tiagak Olivia Richard, 46, i noondo diti hilo’ id Sungso Hospital Andong, Korea Selatan, unsikohon kopio do paganakan dau.
Tumanud Utusan Malaysia, tadi’ di tiagak, Dora Richard, 44, minoboros do ounsikou kopio yau tu’ kinoposoliwanan pokiinsianan ponguhupan kousinan maya’ media sosial om ruputan habar, nakapasaga’ diolo’ nokotimung kousinan di gunoon montok mogowit muli’ tinan tiagak taka’ dau kumaa Sabah.
Gisom di jaam ko 3 di baino’, nakaanu yolo’ RM46,000 katalib mantad ginumu’ di gunoon diolo’ montok kos walai pongubatanom potilombus dino kopongowitan muli’ tinan di tiagak kumaa Sabah.
Wookon di minanahak ponguhupan nopo nga’ koporintaan pogun maya’ Tinimungan Yayasan Sabah om Puru Parlimen Papar, Datuk Armizan Mohd. Ali.
Olivia i mantad Kampung Novoung, Papar, hilo’id Korea Selatan solinaid somok tolu toun. Yau nopo nga’ tinan noiduanan sinowoon om tina’ di tolu tanak kiumur pialatan siam gisom 14 toun.
I tiagak nokito nokoidu’ pogun id walai siwaan dau doid kakadayan Andong, Watas Gyeongsang Utara, Korea Selatan di tadau Kotolu.
Tinan di tiagak owiton muli’ soira’ opongo kapamalantaan soriuk id walai pongubatan. Tinan di tiagak lisokon id Tana’ Pamalabangan Libagu, Papar.
