Ag. Marjohan Ag. Amin
KOTA KINABALU: Ponorikohon Piomungan Koisaan Komulakan Bohogian Poonsokid Siba’, Ag. Marjohan Ag. Amin minokianu mooi di Boyoon Montiri, Datuk Seri Haji Hajiji Haji Noor tumilombus momuruan Koporintaan Pogun montok papatantu’ koponsolon rayat kotilombus poinggompi’ om oumoligan.
Ka disio, sundung haro kopononsogan mooi do mongiliu karaja’ i Boyoon Montiri, laang dilo’ komoyon do amu’ apatut.
Pinosotol disio do i Hajiji minaganu laang di kohunung montok mongumolig Sabah mantad poimamangon di bohogian kikoundaran.
“Mantad dilo’, pokionuon ku oinsanan bohogian manahak kosiwatan kumaa koponoriukan mooi do aanu popoindalan miampai otulid om aadang, aiso’ kosopulan pulitik i kiangkab paparaat ngaran di Boyoon Montiri,”ka disio id kointalangan di tadau baino’.
Marjohan nga’ lumansan mooi di Hajiji do amu’ tumiduku’ di kopononsogan nombo-nombo boogian. Ka disio, lobi kosonong nung tilombuson di Boyoon Montiri kopomorintaan gisom opupusan timpu montok papatantu’ kasasanangan rayat om kaadangon pogun.
“Aiso’ kogunoon di Boyoon Montiri monumboyo’ koponsogan diti sabab kotilombuson om kaadangon pulitik id Sabah kiguno tilombuson gisom orikot Pomilian Agayo Pogun (PRN) obontol,” ka disio kawagu.
Pogulu diti, i Hajiji id iso’ kointalangan minanahak jominan do momogompi’ intodonon mineral Sabah miampai papatantu’ koponguludan dilo’ powonsoiyon miampai osonong om osorisid montok no do timpu dumontol rayat.
Nolim nogi’ disio totondos do Koporintaan Pogun id siriba’ pomorintaan disio pinapalabus lisin mongukad (mining lease). Totondos dilo’, ka di Hajiji, pagkakaa pulitik nopo i kiangkab araat montok mongimbulai koburilongon om mongumpadan kaadangon pulitik pogun.
“Kanou tokou no oinsanan papatantu’ koporintaan diti potilombus kitonggungan, opoduli’, om moningkanan kumaa kogugunoon rayat montok timpu dumontol Sabah di lobi koburu’ om komogot,” ka disio.
Hajiji insan po pinoposotol tonggungan disio kumaa prinsip kaadason, kotulidon, om kinotiu’on id pomorintaan disio, om minanahak jominan kumaa oinsanan rayat Sabah do koponsolon diolo’ toririmo kosili posuulon.
