Dr. Joachim (poindikau, tanga’) guminambar miampai toinsanan i nakaampai id Simposium dilo’.
KOTA KINABALU: Inggisaman mogiuhup nuru’ do powonsoiyon montok monginggirot om popoingkawas do undang-undang om nogi’ katatapan montok monoibau kobolingkahangan pomoyomutan plastik id Sabah miampai lobi kiwaya’, ka di Kumoduo Boyoon Montiri II, Datuk Seri Dr. Joachim Gunsalam.
Pinopolombus isio kotongoban kumaa kinoingkawason pomoyomutan plastik i okon nopo ko’ nosili kobolingkahangan pomogunan nga nogi’ kapanahak waya’ di poindala’ id pogun Sabah.
“Kobolingkahangan diti okon nopo ko’ nosili podulionon id nayatan sompomogunan, nga Sabah amu’ nogi’ koidu’ mantad kotoguang kobolingkahangan di miagal. Pomoyomutan plastik kopongumpadan sandad posorili’ om kapanahak waya’ poinralom kumaa tikid sunduk koposion, kaampai no kolidasan ekosistem om kasasanangan mogigiyon,” ka di Montiri Koporintaan Koiyonon om Pomuwalaian dilo’ ontok pinopoimagon Simposium “No Plastic id Nature” doid Hotel Hilton, Kota Kinabalu di tadau baino’.
Simposium diti piniuhupan manganjur do Komontirian Koporintaan Koiyonon om Pomuwalaian (KKTP) om WWF-Malaysia, nogi’ sinokodung do Sabah CSO-SDG Alliance.
Dr. Joachim (kotolu, gibang) ruminamit tandamato mantad di Dr. Henry Chan.
Dr. Joachim pinoposotol do Sabah, i opuawang do intodonon poinsandad miagal do ‘terumbu karang’, tisan rahat, konuluhan om Nulu Kinabalu, noondo diti pointoguang do koumpadanon pomoyomutan plastik i nokopomidsala’ kinolumison sandad dau.
“Ogumu’ koiyonon i pogulu diti oburisi’ noondo diti noyomutan do rinomos. Id rahat, plastik sanhabu-habu om kolitup do terumbu karang, naamot tisan rahat nogi’ tongo’ pulou noponu’ do plastik. Iti okon nopo ko’ kapamayamut pososorili’, nga nogi’ kapanahak waya’ araat kumaa kokitanan Sabah sabaagi rikoton ponombuluyan topong pomogunan,” ka disio.
Minoboros isio do panalasaian kumaa kobolingkahangan pomoyomutan plastik momoguno kouhupan mantad oinsanan bohogian, kaampai no koporintaan, tinan okon koporintaan (NGO), siktor swasta, mogigiyon om bohogian kikoundaran suai.
Dr. Joachim minamarayou nogi’ pinongonjuran simposium i nosili koiyonon monotk bohogian kikoundaran miilang kointalangan, pomusarahan, om inggisaman kopohompit koponguludan plastik.
“Kalansanan ku, maya’ piuhupan oinsanan bohogian, koponuridong tokou karalano’ ‘intervensi’ di lobi kogirot i moningkanan kumaa koponguludan om kopongingkurian titaam plastik nogi’ kopongilagan kalawason plastik kumaa sandad posorili’.
“Kalansanan ku nogi’ mooi do undang-undang om katatapan ponguludan aanu monginggirot om oingkawasan montok monoibau kobolingkahangan pomoyomutan plastik id Sabah miampai lobi kiwaya’,” ka disio.
Nunsub disio mogigiyon montok amu’ mintong poinggaan kobolingkahangan diti om mamarati do tonggungan monoibau pomoyomutan plastik id lihawa do tikid tulun.
Ka disio, mantad no do inggisaman toinsanan, Sabah koponigampot sondikoton montok poposili pogun poingidu’ mantad pomoyomutan plastik.
Nokotindapou nogi’ Monunurat Osiriba’ (Kopotundaan) KKTP, Johnny Samson; Potunud Ponondulian gompi’ Totuo WWF Malaysia, Dr. Henry Chan om Ponorikohon Perikatan CSO-SDG Sabah, Ruth Yap.
