Hajiji miampai di Jahid om Montiri nogi’ Monguhup Montiri i nokotindapou ontok kinotombuluyan karaja’ kuminaa Komontirian Koburuon Labus Kakadayan id Sembulan di tadau baino’.
KOTA KINABALU: Boyoon Montiri, Datuk Seri Haji Hajiji Haji Noor minonuhu’ do Komontirian Koburuon Labus Kakadayan montok mongingkawas kararalano’ kopoindalanan id koinsanai upis watas doid pogun diti.
“Komontirian Koburuon Labus Kakadayan nopo komontirian oponsol i kitonggungan montok poposimban koiyonon labus kakadayan om mongingkawas rontob koposion mogigiyon,” ka disio.
Kohondot dilo’, sokodung mantad oinsanan upisor watas nopo oponsol montok papatantu’ ababayan kopotundaan koporintaan pogun aanu popoindalan imampai opulokis, ka disio.
“Projik koburuon labus kakadayan id nayatan pogun om Pisompuruan mositi’ poindalanon tumanud timpu. Iti kaampai nogi’ ababayan kopurimanan montok mogigiyon labus kakadayan,” ka disio ontok kinotombuluyan karaja’ kuminaa Komontirian Koburuon Labus Kakadayan doid Sembulan di tadau baino’.
“Bobos oponsol, nosili karaja’ upisor watas montok manalasai kobolingkahangan id kinoiyonon sompoopori,” ka disio.
Boyoon Montiri nga’ mimang nogi’ kinoloidan id kopolobusan elaun montok Puruankuasa’ Koumoligan om Koburuon Kampung (JKKK) asalasai osisikap.
“Pokionuon ku komontirian miontong naangayan upisor id tikid upis watas om papatantu’ karaja’ koindalan tumanud timpu nakatantu’, kaampai no manalasai kobolingkahangan elaun,” ka disio.
Hajiji minonuhu’ nogi’ komontirian montok papaharo kurusus di kosudong kumaa koinsanai sitaf id tikid upis watas montok manalasai kobolingkahangan oponsol id kinoiyonon sompoopori.
Ontok kinotombuluyan karaja’ dilo’, Boyoon Montiri om tinonudan nonuan kopointalangan di Monunurat Pointatap Komontirian Koburuon Labus Kakadayan, Datuk Norlijah Danin di tongo’ ababayan maso-maso komontirian om nogi’ i nakalantoi pinopoindalan.
Wookon ababayan dilo’ nopo projik koburuon okoro’ labus kakadayan, koburuon mongindapu’ labus kakadayan, ikonomi om kogogonopan labus kakadayan, koponoibahan komosikinan, iso’ watas iso’ produk, kaparagatan ikonomi pomoruhang, pangaba’ waig ‘alternatif’ labus kakadayan, pangaba’ lotirik alternatif labus kakadayan om Walai Mesra SMJ.
Nokotindapou nogi’ Montiri Kousinan, Datuk Seri Haji Masidi Manjun; Montiri Koburuon Labus Kakadayan, Datuk Jahid Jahim; Montiri Sains, Tiknologi om Inovasi, Datuk Dr. Mohd. Arifin Mohd. Arif, monguhup montiri om upisor totuo koupisan.
