Dr. Davina Markus Majihi
KOTA KINABALU: Ponorikohon Biro Kolidasan Exco Tinimungan Parti Koonduan Gagasan Rakyat Sabah (Gagasan Rakyat), Dr. Davina Markus Majihi minongunsub tulun ginumuan, lolobi no sukod wagu koonduan i amu’ po insan ponoluod raha’, montok monguhup momonsoi kosimbanon.
Ka disio, pangaba’ raha’ id bank raha’ Sabah toririmo id rontob bobos osiriba’.
Dr. Davina pinoposotol kogunoon di kosonsog kopio montok mononoluod raha’ wagu do mimbulai id kimpin monoluod raha’ om kolidasan ‘Lead With Life’ I pohoroon solinaid duo tadau doid Tingkat 4, Longkod Konvensyen Sompomogunan Sabah (SICC) do hiti, mimpuun suab (ko 9 gisom ko 10tw Kohopod om Iso’).
“Iti no kosiwatan montok koonduan omulok om oinsanan mononoluod wagu do sumili somboogian mantad toisoiso’ di lobi kagayo mantad tinan diolo’ sondiri.
“30 minit no timpu dokoyu nga’ kapanahak no do rati di agayo kumaa sosongulun i momoguno – i potuu nohompitan koligaganan, susumakit Thalassemia, susumakit bato, toi yolo’ i mindalan pamazazakan i momoguno raha’ montok manampasi niawa,” ka disio di konihab.
Maya’ ababayan ‘Lead With Life’, kimpin monoluod raha’ diti kopongimbulai koiyonon di osimbayan kosuul no montok mononoluod wagu.
Kimpin diti popouyu puralan karait kararalano’ monoluod raha’, pomorisaan pomunipoon om kolidasan aiso’ kabayar, nogi’ koiyonon pongunsikohan eksklusif montok mononoluod hinombo diolo’ karamit takanon agaan, karamit setifikit, om gumambar kahandaman.
Bank Raha’ Sabah noondo potoguang kokurion sitok di agayo, om Dr. Davina pinoposotol kogunoon sokodung poinponu’ mantad mogigiyon.
“Tikid turu’ raha’ kapanahak waya’ agayo soumur-umur. Angatan ku komulakan Sabah, lolobi no koonduan, montok umampai id inggisaman manampasi niawa diti,” ka disio.
Montok mongilag mantad timpu mogindad di alaid, isaisai i orohian montok monoluod raha’ kaanu papatantu’ timpu maya’ WhatsApp kumaa numbur 011-26361928.
