Dr. Joachim (poindikau, tanga’) guminambar pongingitanan miampai tombului apantang om oinsanan tutumanud Pitimungan Pogirot Kuasa PBT 2024.
KOTA KINABALU: Kumoduo Boyoon Montiri II, Datuk Seri Dr. Joachim Gunsalam pinoposotol kogunoon oinsanan pogirot kuasa’ Bohogian Kikuasa’ Nokoiyonon (PBT) kiharo ginirot, tinulid om tinonggungan id kopoindalanan karaja’ diolo’.
Pinoporikot isio haal dilo’ di ontok pinopoimagon pomupusan Pitimungan Pogirot Kuasa PBT Sabah 2024, i ki’uhu “Kosimbanon Pogirotkuasa’ Kuasa Bohogian Kikuasa’ Nokoiyonon Sabah: Kitonggungan, Otulid om Opusou Kumaa Kopoinsanangan Mogigiyon” id Shangri-La Rasa Ria, Kota Kinabalu, do hiti, di kosodop.
Dr. Joachim pinoposotol do kopongonjuran pitimungan diti, i kumoinsan nogi’ pohoroo’ pointonod pinonuridongan PBT Sabah, oponsol kopio montok pasarabak sunduan kumaa oinsanan pogirot kuasa’ PBT id pogun diti.
“Oinsanan PBT kiguno katama’ id kopoindalanan tonggungan diolo’ amu’ momoguno sala’ kuasa’, nogi’ patanom kinotulidon, otulid om kitonggungan id tikid karaja’ di poindalanon,” ka disio.
Dr. Joachim (kolimo, wanan), Isnin (kaapat, wanan) om Mohd Hamsan (kaapat, gibang) guminambar kahandaman miampai mamaramit Gaa’ Kobontugan Puru Pogirot Kuasa PBT Sabah toun 2024.11.8
Kalansanan nogi’ disio pitimungan dilo’ kapanahak toilaan poinralom kumaa pogirot kuasa PBT Sabah, mooi do kopoindalan yolo’ do karaja’ kopiongoi di Sondikoton Sabah Maju Jaya (SMJ) om sondikoton komontirian.
Ka di Dr. Joachim, pitimungan diti nopo nga’ iso’ inggisaman montok monginwagu kopogirotankuasa’an PBT mantad sunduk waya’, kopulokison om kinotulidon, kopiongoi di kogugunoon mogigiyon i toririmo sumimban.
Pinosotol disio do koponginwoguan di kalansanan id nayatan pogirot kuasa’ PBT Sabah kaampai no kinotulidon om tinonggungan, pomogunaan tiknologi toi IT id kopoindalanan karaja’, ponginsomokan mimpau mogigiyon, kopoingkawasan toilaan om kotumbayaan maya’ pingludaan, nogi’ koposotolan kumaa prinsip koburuon po’ompus.
“Koponginwoguan diti oponsol montok papatantu sistom kopogirotankuasa’an di kosudong om kiwaya’ id koponoibahan tongo’ kaantaban wagu i otoguang do mogigiyon,” ka disio.
Dr. Joachim (toguang) om Isnin (tohuri) monongkirumo dilo’ tutumanud Pitimungan Pogirot Kuasa PBT Sabah 2024.
Dr. Joachim lumansan maya’ pitimungan diti, pogirot kuasa’ PBT Sabah kosili lobi kikotumbayaan, kitoilaan om kikabaalon miampai momoguno tinonggungan id karaja’ diolo’.
Soginumu’ 122 upisor pogirot kuasa’ PBT Sabah tuminindapou pitimungan solinaid tolu tadau diti.
Dr. Joachim minonongkounsikou nogi’ kumaa puruankuasa’ manganganjur om pinopolombus kapanangkabayahan kumaa Monunurat Pointatap Komontirian, Datuk Dr. Jamili Nais sabaagi Luguan Kopoindalanan id nayatan komontirian i nokopoindalan ababayan diti.
Nokotindapou nogi’ Monguhup Montiri I om II, Datuk Isnin Aliasnih om Datuk Mohd. Hamsan Awang Supain; Kumoduo Monunurat Pointatap II, Faridah Giau i po nogi’ Ponorikohon Manganganjur miuhup miampai Upisor Eksekutif Kounsol Watas Putatan, Helmy Taib.
