Dr. Joachim Gunsalam
KOTA KINABALU: Ponowoli Presiden Parti Bersatu Sabah (PBS), Datuk Seri Dr. Joachim Gunsalam minoboros, isaisai pia nga’ kaanu tumanding id nombo-nombo watas kaampai id Lintuhun Undangan Pogun (DUN) Kundasang, nga’ rayat no i kaanu papatantu’.
Minoboros isio dilo’ minonimbar kumaa kointalangan di Presiden Parti Kesejahteraan Demokratik Masyarakat (KDM), Datuk Peter Anthony i orohian popoimpuun ‘sangod’ montok magahou timpohon DUN Kundasang id Pomilian Agayo Pogun Ko-17 (PRN17) obontol.
“We are a democratic country where anyone is free to contest. Ultimately, it is the rakyat who chose who they want to represent in the State Legislative Assembly. (Yati’ nopo nga’ pomogunan demokrasi hinombo do, isaisai nga’ osimbayan tumanding. Tohuri nopo nga’, rayat no i momili’ isai i onuon mongobi’ diolo’ id Lintuhun Undangan Pogun,” ka di Dr. Joachim i po nogi’ ADUN Kundasang id iso’ kointalangan media di tadau baino’.
Kumoduo Boyoon Montiri II dilo’ minoboros, isio miampai kukumaraja’ kopoindalanan om ‘task force’ PBS Kundasang tumilombus kumaraja’ om manahak surupukaraja’ kumaa rayat.
Ka disio, DUN Kundasang nokoburu’ kaampai no i kopotundaan tongo’ kogogonopan i noondo masaan id pamansaian kaampai no monginsonong rontob talun-alun mantad Tarawas/Kaingaran om mantad Singgaron kumaa Mansalu, pangaba’ waig oburisi’ mantad loji Pinawantai Mukim Timbua, pangaba’ waig oburisi’ mantad loji Wayan Mukim Malinsau/Kaingaran om somok 85 pihatus nakaanu no pangaba’ lotirik.
“Naamot, projik sorokoro’-koro’ kikiro 75 pihatus tikid kampung nakaanu no lintuhun okoro’.
“Potontuon ku oinsanan kukumaraja’ kopoindalanan id DUN Kundasang kapanahak surupukaraja’ bobos osonong om poporuput kumaa doho’ miampai mitilombus sabab yoho’ nga’ pokionuon nogi’ id nayatan koporintaan pogun sabaagi Kumoduo Boyoon Montiri om Montiri Koporintaan Koiyonon om Pomuwalaian,” ka disio.
Mokianu nogi’ isio di oinsanan lansanon om puru PBS do tumilombus kumaraja’ agaras montok no do PBS tu’ yolo’ koinsanai popoburu’ om ilo’ nopo nga’ montok rayat Sabah.
Dr. Joachim i mongingigit timpohon DUN Kundasang, pinoposotol nogi’ do isio miampai Puru Kounsol Akawas (AMT) PBS poungkakat ogirot miampai katatapan do tumilombus koporintaan Gabungan Rakyat Sabah (GRS) id siriba’ buruanon di Boyoon Montiri om Ponorikohon GRS Datuk Seri Haji Hajiji Noor.
