Dr. Joachim (poindikau, tanga’) guminambar pongingitanan miampai di Dr. Jamili (kaapat, gibang) om oinsanan nokotindapou id kinotombuluyan kembara PBT Kota Marudu.
KOTA KINABALU: Montiri Koporintaan Koiyonon om Pomuwalaian (KKTP), Datuk Seri Dr. Joachim Gunsalam minoboros, komontirian disio momuruan ‘task force’ montok monorisid om mogihum panalasaian koiyonon panaaman rinomos miampai do tongo’ Bohogian Kikuasa’ Nokoyonon (PBT).
Kobolingkahangan nopo dilo’ nga’ wookon haal i pinosunud ontok kinotombuluyan kembara disio kumaa PBT Kota Belud om Kota Marudu di konihab (8tw Koonom).
Id kinotombuluyan doid PBT Kota Belud, Dr. Joachim po nogi’ Kumoduo Boyoon Montiri II nonuan kointalangan kopoindalanan di Upisor Eksekutif Kounsol Watas Kota Belud, Kamariah Haji Ismail.
Dr. Joachim (poindikau koonom, wanan), Dr. Jamili (poindikau kolimo, gibang) guminambar pongingitanan miampai puru karaja’ Kounsol Watas Kota Belud.
Nokotindapou nogi’ Puru Lintuhun Undangan Pogun (ADUN) Tampasuk, Datuk Mohd. Arshad Bistari; Monunurat Pointatap Komontirian, Datuk Dr. Jamili Nais; Ponorikohon Kounsol Watas Kota Belud, Haji Bakri Haji Nanun; mobi’ Luguan Pulis Watas Kota Belud, Insp. Sabestian Ak Pendie; nogi’ tongo’ Puru Kounsol Watas om upisor ngaawi’ KKTP.
Wookon haal i pinogibabarasan nopo nga’ kobolingkahangan koiyonon panaaman rinomos.
Ontok kinotombuluyan doid PBT Kota Marudu, Dr. Joachim om tinonudan nonuan kopointalangan Kopoindalanan Kounsol Watas Kota Marudu di Upisor Eksekutif dilo’, Abdul Sani Arsat.
Pinoilo isio do koiyonon panaaman rinomos montok Kota Marudu amu’ katampung ginumu’ rinomos i opuhu do Kounsol, suai ko’ wawaya’an kumaa longkod panaaman naraag om osusa’ do maya’ soira’ timpu rumasam om kiguno insonongan.
Kinotombuluyan nopo dilo’ nga’ wookon di kotombuluyan kembara Dr. Joachim kumaa koinsanai PBT id Sabah i nokotimpuun di kolimpuunon toun diti.
