Hajiji minonorikohon mitingan talib kabinet Koupisan Boyoon Montiri di tadau baino’.
KOTA KINABALU: Boyoon Montiri (KM) Datuk Seri Haji Hajiji Haji Noor minonuhu’ Koupisan Waig do momoguno undang-undang id siriba’ kaganaan kuasa’ dau om mogowit momumusala’ kapanakahan waig kumaa kuut undang-undang.
“Gombiton yolo’ om dawahon id kuut,” ka disio.
“Ingkaa nogi’, mimang tokou kilang ngaawi’ i oilaan manakau waig owiton kumaa kuut om okon ko’ papalabus no do kompaun,” ka disio.
Minoboros isio, oponsol kopio montok laang okodou onuon kohondot diolo’ i manakau waig tu’ kopongoputan aiso’ kasalaan noilaan do intodonon agayo 60 pihatus waig aiso’ asil (NRW) id Sabah, i po nogi’ bobos akawas id pomogunon diti.
Minoboros id mitingan talib kabinet Koupisan Boyoon Montiri di tadau baino’, Hajiji minoboros, Kabinet Pogun minomolohou Koupisan Waig montok kointalangan nosusuhut kopokitanan kopurimanan iso’ tinimungan, kaampai susumikul Univositi Malaysia Sabah (UMS) monugat kobolingkahangan waig dilo’ salasaion.
“Kabinet Pogun pinoilo do id suang timpu duo wulan nakatalib, UMS nokotoguang no do kakasahon pangaba’ waig solinaid iso’ toi duo tadau gama-gama’ paip nababak,” ka disio i pinopoilo Koupisan Waig nakapaaba’ do waig kumaa UMS id pialatan apat riong gisom turu’ riong liter tikid tadau oruhangan di tiub torobong i kapangaba’ iso’ riong liter tikid tadau.
“Nopokianu ku i Timbang Canselor UMS monorisid haal dilo’ montok mongilo intodonon waig amu’ korikot kumaa susumikul,” ka disio.
Kabinet pinoilo do pangaba’ waig kumaa UMS muri’-kukri’ nosusuhut ogumu’ kinopooputan aiso’ kasagaan noilaan mantad limo kampung gisom doid univositi, ka disio.
“Gama’ dilo’ pokionuon ku bohogian pogirotkuasa’ Koupisan Waig mooi om momutut pinongoputan aiso’ kasagaan diti. Suai dilo’, maganu laang okodou kohondot di momusala’,” ka disio i minoboros kopongoputan aiso’ kasagaan dilo’ noilaan mangaba’ waig kumaa pipiro kampung i poinsumpang i oolikudan UMS, ilo’ nopo ng’a id tana’ di nosili pigogutan diolo’ i mongingiyon tana’ om sanganu tana’.
“Pikikiro, Koupisan Waig kaanu popoudong tangki 500 liter id koiyonon om mongontok bayaran kumaa mogigiyon do hilo’ montok waig. Iti kaantob diolo’ mantad popooput kawagu miampai aiso’ kasagaan id paip waig,” ka disio.
Sundung ingkaa ka disio, tonggungan Koporintaan Pogun nopo mangaba’ waig om mogisusuai inggisaman winonsoi pasansala’ mantad totondos pembangkang.
Loji Pongubatan Waig Telibong II nopongo om noondo diti mindad po kapamasangan paip waig do opongo, ka disio i pinopointalang soira’ do opongo ilo’ koposodia’ pomoruhang 160 mld montok manampung bohogian koibutan Sabah kaampai UMS om koiyonon pososorili’ dilo’.
Suai dilo’, karaja’ kopomoruhangan pangaba’ waig id bohogian koibutan Tisan Kotonobon i kapanahak koundaran kumaa mogigiyon id Papar, Lok Kawi om Putatan notimpuunan no di walu’ tulan nakatalib om pikikiro opongo dumontol 2026.
