Hajiji Haji Noor
KOTA KINABALU: Koporintaan Sabah miampai poinsotol pinopohimagon do amu ilo’ mongiliu kopotutan koundangan Pogun Sabah kohondot kapanahakan pinotomod 40 pihatus Asil Oborisi’ id siriba’ Perkara 112C om 112D Koundangan Pisompuruan.
Boyoon Montiri, Datuk Seri Haji Hajiji Haji Noor minoboros, haal diti pinoinggirot id boboroson Bajet 2023 hinombo do i Luguan Montiri minangakun om pinopoimagon do Koporintaan Pisompuruan pointopot do mongingkawas rontob Kapatahakan Pinotomod nung piadangon di nunu i nopiokunan pogulu diti om monginsikap pibabarasan montok mogihum ralan panalasaian.
Hajiji pinopointalang, haal ‘kritikal’ diti kakal pibabarasan id Puruankuasa’ Teknikal Kounsol Karaja’ Kopoindalanan Pibatosan Malaysia 1963 (MA63) i ponorikohon di Kumoduo Luguan Montiri.

Lansanon Gabungan Rakyat Sabah (GRS) ruminuba’ di Boyoon Montiri montok pinopokito sokodung karait 40 pihatus koponguludan geran pinotomod asil oborisi’ id Seri Gaya di tadau baino’. (Mantad gibang, Presiden LDP Datuk Chin Su Phin, Ponowoli Presiden PBS Datuk Seri Dr. Joachim Gunsalam, Presiden STAR Datuk Seri Dr. Jeffrey Kitingan, Presiden PGRS/Ponorikohon GRS Datuk Seri Haji Hajiji Haji Noor, Presiden SAPP Datuk Seri Yong Teck Lee, Presiden USNO Tan Sri Pandikar Amin om Kumoduo Presiden PGRS Datuk Seri Masidi Manjun.
“Tumilombus yahai momusus kopotutan koundangan Sabah kohondot karalano’ piilangan asil di poinharo mantad om iti mositi’ pantangon do Koporintaan Pisompuruan. Iti kaampai no kopokionuan Sabah montok “toun-toun di natagak” hinombo do aiso’ pinonorisidan pinoindalan mimpuun toun 1974 gisom nodi kaawagu diti.
“Id timpu diti, haro pinonguludan naamot – mimpau do katatapan aiso’ kopurimanan poinsala’ (prejudis) – hinombo o Sabah nakaramit lobi kogumu’ mantad pogulu diti naamot mindad pibabarasan potilombus id pialatan Koporintaan Sabah om Pisompuruan montok mokianu nunu i apatut kumaa Sabah. Om nogi’, naamot mindad pibabarasan di mamaso poindalan, ginumu’ ‘interim’ (kikoyuon naamot) nokoingkawas mantad RM125.6 riong di 2022 om mantad RM260 riong i pinahabar di wulan Koiso’ 2023 kuminaa RM300 riong di wulan Koturu’ 2023. Sundung diti do amu’ nokorikot di piiman-imanon, pointopot om po’ompus yahai id koonuan lobi kogumu’ mantad Koporintaan Pisompuruan nung poidaron di pogulu diti.
“Daamot dilo’, pologoson oku popointalang, mamantang yahai kopotutan Koisaan Undang-Undang Sabah montok minonimpuun prosiding undang-undang karait hal diti. Mangakun yahai tonggungan oponsol ‘litigasi’ koponsolon ginumuan id kopointutunan kobontugan undang-undang kumaa pomorintaan kaadangon id aadang om aadas.
“Koporintaan Pogun kokito inggisaman SLS mantad sunduk di osonong i amu’ mongobi’ om amu’ mimpulitik id kopotilombusan toinsanan koponguludan koundangan soira’ Sabah minonuridong Malaysia di 1963. Amu’ oku monogulu kootusan Kuut Pokinsianan nga’ popoilang oku kopurimanan di oirad miagal mogigiyon Sabah om lumansan nunu-nunu kopongobi’ do Sabah,” ka disio id iso’ kointalangan di tadau baino’, pinopointalang nindikohonon pohimagon Koporintaan Sabah kohondot Kopotutan Koundangan montok monugat 40 pihatus Asil Oborisi’ mantad Koporintaan Pisompuruan.
Hajiji minoboros, nosuhu’ no disio Luyar Agayo Pogun montok monorisid om mogintong kawagu prosiding undang-undang i masaan poindalan om nung kiguno, popohunung nunu-nunu kointalangan poinsansala’ i sopisuai mantad ningkakaton atalang om pohimagon Sabah.
“Sundung prosiding i masaan poindalan id Kuut Pokinsianan – monimporon yahai ponugatan poinbida’ Koporintaan Sabah do Koporintaan Pisompuruan kitonggungan mantad sunduk undang-undang om koundangan montok mambayar ‘pampasan’ kumaa Sabah montok nunu i apatut miampai pohimagon sabaagi kapanahakan pinotomod, mantad sunduk kaantakan laid om timpu dumontol. Kopotutan Pogun nopo nga’ kopotutan kousinan Sabah. Ningkakaton diti lobi ko’ mantad do angkab nopo tomod.
“Nung aiso’ kookunan toi panalasaian id pialatan Koporintaan Sabah om Pisompuruan kohondot kapanahakan pinotomod dilo’, gumura’ tokou papapanau kotontuan koundangan montok poposili mangangadang mimpoopori monotk papatantu’ haal diti om papatantu’ nunu i Koporintaan Pisompuruan apatut pabayaron kumaa Sabah.
“Manahak oku jominan kumaa mogigiyon Sabah do amu’ tokou tumingkod id inggisaman tokou aiso’ kotingkodon momogusa’ koinsanai kopotutan Pogun i poinapatut id siriba’ MA63 om Koundangan Pisompuruan.
“Iti no ningkakaton dahai di amu’ aanu gangahon om pohimagon,” ka disio.