Dr. Joachim pinopoindalan kinopomutulan ribon ponokotanda’ kinopohimaganan jambatan wagu Baang Malinsau, Kg. Linapasan.
RANAU: Kumoduo Boyoon Montiri i po nogi’ ADUN Kundasang, Datuk Seri Dr. Joachim Gunsalam pinopohimagon jambatan gantung wagu kininaru 90 meter posoborong Baang Malinsau, Kampung Linapasan id Mukim Malinsau, koiyonon Lintuhun Undangan Pogun (DUN) Kundasang, do hiti di konihab (9tw Kolimo).
Kogogonopan dilo’ kapanahak koundaran kumaa 278 tulun mogigiyon kampung i kogumuan diolo’ poingampai id kaparagatan pomutanaman.
Kinopohimaganan nopo dilo’ nga’ kopihonot kinotombuluyan disio doid Kg. Linpasan minooi ruba’ do mogigiyon do hilo’. Nakaampai nogi’ i Monunurat Pulitik disio, Yubidi Gompoyo; Lansanon Koburuon Mogigiyon (PPM) Kundasang, Dounis Bolo; Popoburu’ Mukim, Ratimin Kononut; Mobi’ Luguan Mamasok Pogun (WKAN), mogigiyon pososorili’ kampung om sitaf Unit Lansanon Koburuon Mogigiyon (UPPM) Kundasang.
Dr. Joachim (tanga’) guminambar pongingitanan miampai mogigiyon kampung katalib pinopoimagon galanggang buul tapapon wagu Kg. Linapasan.
Suai mantad dilo’, Dr. Joachim i tinanud di Molohingon Kampung Linapasan, Rudi Barani pinapatahak nogi’ do kunci Walai Mesra Sabah Maju Jaya (SMJ) kuminaa di apat mamaramit.
“Montok DUN Kundasang, koporintaan pinopoobi’ soginumu’ 20 unit walai SMJ kumaa diolo’ i momoguno kopio do tikid toun suang timpu tolu toun diti.
“Nung GRS kakal do momorinta’, ababayan diti maan tilombuso’,” ka disio kawagu.
Pinopoindalan nogi’ isio kinopohimaganan galanggang buul tapapon wagu i nokopokito pinisahapan id pogialatan mogigiyon kampung do dilo’.
Dr. Joachim (kotolu, wanan) pinapatahak kunci walai kuminaa songulun mantad apat mamaramit Walai Mesra SMJ id Kg. Linapasan.
Minoboros kuminaa media talib dilo’, Dr. Joachim i po nogi’ Montiri Koporintaan Koiyonon om Pomuwalaian minoboros, pipiro talun-alun masaan do wonsoiyon id DUN Kundasang wookon nopo talun-alun mantad simpang Terawas pakaya’an Kg. Kaingaran om mantad simpang Bongkud kumaa Mini Estet Sejahtera (Mesej) id Kampung Mansalu.
“Gisom noondo diti, iti nopo nga’ projik kapamansaian talun-alun bobos agayo do hiti,” ka disio, i pinopoilo do kapamansaian talun-alun dilo’ kopohompit kos kiginumu’ lobi RM240 riong.
Suai mantad dilo’ ka disio, bohogian dau id kopongupalaian kumaa koporintaan montok ralan ngaawi’ kampung miagal ralan kumaa Nalumad om haro pipiro projik talun-alun pomutanaman montok insonongan id timpu duo gisom tolu toun, pikikiro kopohompit kos soginumu RM40 riong.
Dr. Joachim minoboros, bohogian disio miampai Upis Watas nga’ mongintutun nogi’ nunu kogugunaan suai i gunoon id DUN Kundasang i kiharo 69,000 mogigiyon.
