PATI mamasok Filipina i nuyung lumabus kumaa pogun nantadon maya’ Dodopiton Sandakan di tadau Kotolu.-Gambar Imigrisin Sabah
KOTA KINABALU: Soginumu’ 2,013 modidikot songkosuayan aiso’ kasagaan (PATI) mamasok Filipina pinaatod minuli’ kumaa pogun nantadon maya’ ababayan kopoundolihan tahanan PATI po’ompus timpu limo wulan kumolimpuunon toun diti.
Tumanud Utusan Malaysia, Potunud Imigrisin Sabah, Datuk Sh Sitti Saleha Habib Yussof minoboros, koinsanai tahanan pinaatod muli’ kumaa pogun nantadon maya’ padsakaian rahat om tawan.
Minoboros isio, kinapaatadan kaawagu winonsoi di tadau Kotolu nokopohimpit kinoponguyungan 226 tulun tahanan mamasok Filipina mantad Depot Imigrisin Sandakan.
Koinsanai 226 tahanan i pinaatod muli dilo’ kiumur pialatan duo gisom 73 toun i nakapaampai 209 nosukod kusai om tondu’ nogi’ 17 tanak-anak kiumur 12 toun poinsiriba’.
“Tangaanak di nokohompit do kinapaatadan minuli’ nopo nga’ miampai molohing om mitatamong diolo’ sompoopori maya’ rahat i minomoguno padsakaian Vessel MV Antonia 1 mantad Dodopiton Sandakan pinakaya’an id Zamboanga City, Filipina.
“PATI di nokohompit diti baino’ nopo nga’ tahanan mamasok Filipina mantad Depot Imigrisin Sandakan nopo,” ka disio id iso’ kointalangan di konihab.
Tumanud di Sitti Saleha, koinsanai PATI i pinoundaliu pinopowonsoi mogisusuai kasalaan id siriba’ Akta Imigrisin 1959/63 om Kooturan-Kooturan Imigrisin 1963.
Ka disio, ukuman di pinoontok nga’ tumanud nogi’ do koundangan pogun gisom no do laang kopoundolihan lumabus kumaa pogun nantadon pinoontok.
Minoboros isio, Koupisan Imigrisin Malaysia (JIM) Sabah tumilombus popoindalan karaja’ kopogirotan kuasa’an nogi’ maganu kopohimaganan mantad lansanon takawas pogun nantadon sompoopori.
