Joniston Bangkuai
KOTA KINABALU: Maganu koyuon di kotumbayaan mogigiyon kumaa Gabungan Rakyat Sabah (GRS) om piuludan dilo’ miampai Pakatan Harapan (PH) Sabah id kopomorintaan Sabah, aiso’ padaahan montok GRS popiromut pisokodungan miampai parti suai i poinlongkod id Semenanjung Malaysia.
Luguan Kopointalangan GRS, Datuk Joniston Bangkuai minoboros, mantad no dilo’, GRS moningkanan inggisaman mamagampot sondikoton Sabah Maju Jaya id kopoburuan pogun om monompuru mogigiyon suai ko’ tumilombus monginggirot po do pisokodungan di haro mantad miampai PH Sabah.
“GRS osimbayan kopio miampai PH Sabah om tongo’ tambalut suai.
“PH Sabah minomili’ montok monokodung ponorikohon GRS Datuk Seri Hajiji Noor sabaagi Boyoon Montiri Sabah soira’ wookon ADUN UMNO Sabah miniupakat miampai Parti Warisan (WARISAN) do papaatu’ koporintaan buruanon disio di kolimpuunon toun 2022.
“Kootusan PH Sabah monokodung di Hajiji sabaagi Boyoon Montiri nounsub di kotongoban do waya’ kopoburuan Sabah ohimpogongan di koyuon pulitik amu’ ogirot gama-gama’ laang bohogian atantu’ i momoliwid koporintaan di noturidong,” ka disio id kointalangan di tadau baino’.
Joniston minoboros, GRS kokito angkab Parti Bersatu om Parti Pejuang montok misokodung miampai dau sabaagi tanda’ kotumbayaan goduduo parti dilo’ di kinotulidon om kinotopoton piomugan parti nokoiyonon dilo’ sabaagi momuruan Koporintaan Sabah.
“Sabaagi piomungan parti nokoiyonon, GRS toririmo tumanud di pomusarahan om pinurimon mogigiyon Sabah id kapamansaian nunu-nunu kootusan.
“GRS mongunsikou tokou rarami osonong om kopurimanan osimbayanan kogumuan mogigiyon Sabah kumaa Koporintaan GRS-PH Plus,” ka disio kawagu.
Presiden Bersatu, Tan Sri Muhyiddin Yassin pinoruput minoboros do parti disio monorisid nung misokodung miampai GRS id Pomilian Agayo Pogun ko-17 (PRN17) i maan pohoroo’ do toun tiso’.
Daamot dilo’, Presiden Parti Pejuang, Datuk Seri Mukhriz Mahathir nopo nga’ pinoruput do minoboros parti disio kiginawo popiromut pisokodungan miampai GRS mononguang PRN do obontol.
