Dr. Joachim (koduo, gibang) om Dr. Jeffrey (koduo, wanan) pinopokito dokumen MoU i sinoinan om sinasi’ di Pairin (tanga’). Okito po nogi’ io’ Julita (gibang) dii Edward) wanan).
PENAMPANG: Parti Bersatu Sabah (PBS) om Parti Solidariti Tanah Airku (STARSABAH) di tadau baino’ miampai poimagon minonimpuun pisokodungan pulitik i ointutunan sabaagi BERSATU-SOLIDARITI (BEST).
Goduduo parti id Gabungan Rakyat Sabah (GRS) dilo’ minisain Memorandum Pihunungan (MoU) pisokodungan id ababayan i pinapanau id Unity Hall, Hongkod Koisaan KDCA, do hiti, di sodopon konihab.
MoU dilo’ sinoinan di Kumoduo Presiden PBS, Datuk Seri Dr. Joachim Gunsalam i minongobi’ di Presiden Datuk Seri Dr. Maximus Ongkili, miampai Monunurat Agayo PBS, Datuk Julita Majungki id koobian PBS, om i Presiden STARSABAH, Datuk Seri Dr. Jeffrey Kitingan om Monunurat Agayo STARSABAH, Datuk Edward Linggu id koobian do STARSABAH.
Sinasi’ ilo’ di Monontuduk Agayo PBS, Tan Sri Joseph Pairin Kitingan.
BEST mimpau kumaa limo hal poguluonon ilo’ nopo:
• Monginggirot pisokodungan om piuhupan pulitik.
• Misokodung om miuhup id panalasaian tongo’ haal ngaawi’ agayo id Sabah.
• Ponuridongan Kounsol Lansanon Miamung (JLC) pialatan PBS om STARSABAH.
• Miilang Kointalangan om Pingludaan Kopomuruanan.
• Ponuridongan Puruankuasa’ Strategik.
Kolimo-limo haal diti pinibabarasan om sinorisid doid MoU i sinoinan ontok tadau kisusuyan kahandaman diti.
Minoboros kuminaa magaganu habar katalib ababayan dilo’, Dr. Joachim om i Dr. Jeffrey iso’ pomusarahan do BEST koponginggirot po kopio okon nopo ko’ nindikohon goduduo parti nga nogi’ GRS.
“BEST okon ko’ iso’ pogundoronok kumaa tongo’ tambalut suai id GRS nga’ monginggirot nindikohon GRS lolobi no kopio id koponoguangan pomilian agayo obontol.
“Soira’ tokou kopogirot GRS, GRS nga’ kopogirot dati’,” ka diolo’.
Dr. Jeffrey pinopointalang do i Boyoon Montiri, Datuk Seri Haji Hajiji Haji Noor i po nogi’ Ponorikohon GRS nga’ minanahak sokodung 100 pihatus kumaa pisokodungan diti.
Dr. Joachim minoboros, maan nopo kopio, BEST kituduan montok monginggirot piuhupan pulitik pialatan PBS om STARSABAH.
“Ilo’ tuduan kopio di otopot no.
“Suai ko ilo’, kaakun tokou nogi’ montok manalasai tongo’ haal ngaawi’ agayo montok koponsolon mogigiyon Sabah.
“Orohian oku poposotol do sondikoton dahai nopo nga’ montok nogi’ kalantaion GRS miampai poinpuli,” ka disio.
Goduduo Kumoduo Boyoon Montiri Sabah dilo’ nga’ iso’ pomusarahan nogi’ do PBS om STARSABAH kiguno maganu pontudukan mantad nawawaya’an di nakatalib i okon nopo ko’ nokopongimamang diolo’ nga nogi’ mogigiyon om pogun diti.
“Mantad no do aiso’ pihunungan ikd pomilian agayo di nakatalib, nakalantoi tokou nopo do 13 tindikohon… diti baino’, kalantoi tokou do intolu pilipat,” ka di Dr. Jeffrey.
“Minanain tokou MoU diti montok papatantu’ dati’ do amu’ kopomohulit kinosilapan tokou om kaanu tokou mamagampot angkabon mogigiyon.
“Kapatahak tokou do haal di osonong om kosigampot di poburuon tokou miampai miuhup,” ka di Dr. Joachim.
Maya’ puruankuasa’ pinotomod i tinuridong, BEST masaan monorisid tindikohon-tindikohon di wagu i tondingon id pomilian agayo do obontol.
PBS pasanganu turu’ tindikohon Lintuhun Undangan Pogun (DUN), naamot STARSABAH onom tindikohon.
Naamot dilo’, i Pairin minoboros, MoU dilo’ kopokitanan iso’ pisimpangan ralan om kopokito kopurimanan karit kogunoon misompuru montok Sabah om timpu dumontol dau.
“Ilo’ pogi’ do ounsikou oku kopio. Orohian oku poposotol do iti no laang kumoiso’ om haro ogumu’ karaja’ i nuru’ do powonsoiyon talib diti,” ka disio.
