Jahid om koruhang, Datin Malianah Ugau guminambar pongingitanan miampai mananwalai id Ramai Walai Poingukab Tadau Raya Aidilfitri doid Kampung Suang Bangau, Tenghilan.
TAMPARULI: Montiri Koburuon Labus Kakadayan (KPLB) Sabah, Datuk Jahid Jahim minoboros, nubasanan mogitotombului i po nogi’ iso’ kinoubasanan do sompipi’ paganakan, sombol walai om koombolutan ontok Tadau Raya Aidilfitri om kararamaian suai nuru’ do tilombuson.
“Maganu timpu om kosiwatan montok popogirot piromutan ‘silaturahim’ sompipi’ paganakan, sombol walai om tambalut, mooi do kapaganu tokou timpu otitimung, mogiboros-boros om popogirot pogihunungan di haro mantad,” ka disio ontok tuminindapou Ramai Walai Poingukab Tadau Raya Aidilfitri paganakan di Upisor Koburuon Mogigiyon (CDO) Tamparuli, Gustin Gagah id Kampung Suang Bangau, Tenghilan.
Ka di Jahid, nubasanan mogitotombului ontok Tadau Raya koposuni piuludan om pogihunungan id koyuon di poinponu’ kounsikohan om barakat.
“Kotombuluyan diti kosili kosiwatan montok momolihu koinsanai pisuayan om monginggirot piobpinoian id pogialatan tulun mantad nantadon om kotumbayaan di sopisuai.
“Nuru’ tokou poposili kotombuluyan ontok Tadau Raya sabaagi wookon mantad tungkusan koubasanan di oponsol, mooi do kopomogompi’ om koponginggirot tokou kointutunan koubasanan, om mamantang nogi’ mamagatang kopogisusuaian koubasanan id pososorili’ dati’.”
Ramai dilo’ notindapou nogi’ di tongo’ lansanon mogigiyon mantad poliliput watas okoro’ Tamparuli, kaampai no tongo’ lansanon pulitik koporintaan om pembangkang.
