Raisin (kaapat, wanan) om i Harun guminambar pongingitanan miampai susumikul Madrasah Tahfiz Al-Quran Al-Karim Kampung Benoni.
KOTA KINABALU: Soginumu’ RM360,000 pinoobi’ do Komontirian Sains Tiknologi om Inovasi (KSTI) montok kopoindalanan STEM Fiesta 2024 kumaa Upis Balajaran Watas (PPD) id Sabah.
Potunud Balajaran Pogun, Datuk Raisin Saidin minoboros tikid PPD karamit RM15,000 nung piadangon di RM10,000 i naramit toun di nakatalib montok papaharo tongo’ ababayan kopoingubasan Sains, Tiknologi, Kejuruteraan om Matematik (STEM) id sikul.
“Ontok tadau diti PPD Kota Kinabalu, Penampang, Papar om Tuaran sopipoopori minamaramit kousinan kiginumu’ RM15,000 om haro 20 PPD po i karamit kinopoobian di miagal.
“Otumbayaan oku kinopomoruhangan ginumu’ kinopoobian i pinosodia’ do KSTI montok PPD popoindalan karnival toi toun diti ointutunan do Festival STEM Fiesta koposindak po om kopoinsingubas nubasanan STEM id nayatan tongo’ tangaanak.
“Miampai diti, kalansanan tokou o sondikoton Koupisan Balajaran Pogun Sabah (JPNS) id siriba’ angkab Sabah Maju Jaya montok mongimbayat lobi kogumu’ susumikul maganu mato balajaran STEM koinggumu’.
“Di toun nakatalib, JPNS nakalantoi minonigampot 28.78 pihatus om toun diti kalansanan tokou ginumu’ dilo’ koinsawat kumaa 35 pihatus,” ka disio ontok rinubaan id Ramai Semarak Kasih Ramadan om Ramai Mongukab Puasa onjuran KSTI.
Nakapanau nogi’ id ramai dilo’ kinapatahakan toluod kumaa 30 susumikul Madrasah Tahfiz Al-Quran Al-Karim Kampung Benoni i pinotunui di Monguhup Montiri KSTI, Datuk Harun Durabi.
