Molohingon Pogun Sabah, Tun Juhar Mahiruddin.
KOTA KINABALU: Tadau Raya Aidilfitri koposodia’ kosiwatan kumaa mogigiyon do popironit silaturahim om nogi’ monginggirotpo do pisompuruan id pomogunon diti.
Molohingon Pogun Sabah (TYT) Tun Juhar Mahiruddin ontok pinapatahak Pason Tadau Raya Aidilfitri 1445H minoboros mogigiyon Sabah o kosuul no, kiguno minggisom monsupu’ lobi gumu’ kosiwatan pisompuruan nogi’ moningkod do piuriasan miagal do pogoyuan mindadala’ (ketaksuban), i potuu id sunduk ugama’ toi ko’ tinaru.
“Koburuon sosonginan pomogunon aiso’ rati, nung pogoyuon pihunungan, piuludan, pogititimbangan id koposion mogigiyon orukut tinaru poindisanon.
“Pogoyuon opoduli’ kumaa pisompuruan kiguno tilombuson posuni om gompion mooi do koinsanai palan montok kopoburuan om kopoindalanan katatapan kumaa piadasan sosial aanu popoindalan do poinlantoi.
“Songkuro dii kinorugion soira’ hinapadan i nawayaan tokou poinpasi mogiamung id koyuon di otoronong, nga’ id songkirop nopo atagak om opunso sasabab nodi koulalaho’ om boros ngaawi’ popiodu i kotinong kokusutan mogigiyon.
“Koyuon mogisisiou, nubasanan mogitotombului om rumuba’ tambalut toi ko’ paganakan i amu’ songkuro kinonosipan apatut kopio nogi’ koponumboyo’ di pokinuon ugama.
“Mantad dilo’, timpu olumis Aidilfitri diti apatut kapamabang nulinau atalang tulun Islam id kopomoromitan pogisuaian nubasanan miampai mongiwang wawaya’an walai mamaramit korikotan tambalut nogi’ sombol di sopisuai ugama.
“Iti kopihunung di komoyon Islam ilo’ nopo nga’ iso’ ugama’ winonsoi Allah Subhanahu wa ta’ala (SWT) i ogonop, kopuli do koinsanai kooturan, undang-undang i mongunsub kasasanangan, kotoronongon, piuludan id koponguludan koposion tulun i potuu miampai fardi (minsosongulun), paganakan, koinsanai mogigiyon om pomogunon,” ka disio pinopointalang.

Sawo di Tun Juhar, Toh Puan Norliah R.M Jasni.
Suai dilo’, Tun Juhar minongunsub mogigiyon do tumilombus monimporon pogititimbangan pialatan tinaru om magada’ karaaton nogi’ kopindaadala’an i kopomiraag do pihunungan.
“Kopurimanai no do pogun diti mositi’ pususon om oumolig mnatad pogogoyuon pagkakaraat, kopindadalaan om koulalaho’ di kosudu kotogodon kumaa toisoiso’ tinaru toi ko’ ugama’.
“Id suang Surah Al-Hujurat Ayat 10-13, Allah SWT pinoposotol kogunoon kikopurimanan pogititimbangan sompipi’ tulun Islam om toririmo minggisom mongimbulai piuludan.
“Ayat po nogi dilo’ nga’ pinopointalang do pisuayan sinakagon om tinaru i sinupu’ Allah SWT kituduan montok dati’ sopi’intutun okon ko’ mongimbulai pioduhan,” ka disio.
Id amu’ kotontuan ikonomi pomogunon noondo diti, Tun Juhar minamason do mogiigiyon mooi do momuriman tuduan kopio do kapamaramaian tadau raya om monidsorou id kopomoromitan Aidilfitri.
“Suai ko’ mongunsikou do kotoronongon om piupakatan koposion id mogigiyon, kiguno tokou nogi’ do monidsorou om toririmo sumosodia’ di nunu nopo kopikikiraan i aantakan kumaa pogun toi ko’ pomogunon tokou.
“Kointalangan diti pikikiro doti’ do ‘klise’ (asaru’ opirorongou) montok diolo’ i kikosukupan om amu’ songkuro noumpadanan dilo’.
“Nung kaanu tokou momuhondom kawagu tuduan kinopoindalanan ibadah puasa id wulan Ramadan, nga’ tantu’ po nogi’ dati’ do kopomoguno koinsanai pokionuon ugama’ mooi do momili’ pogoyuon monidsorou id nunu nopo koyuon.
“Ilagon kopomirubatan, babalanja’ no tumanud kogoosan kousinan dati’, kada’ umbal momit karalano’ kopiont ulun suai, nga’ adangon o baju id tinan sondiri’.
“Siliu no do mogigiyon toi moomoguno di komilo om lobi mingat-ingat kumaa tusin di pabalanjaon,” ka di Tun Juhar.
Id Syawal di obitua po nogi diti, Tun Juhar minagangat tulun Islam do popoinsingubas ‘sedekah’ miampai rumapou tongo’ fakir om mosikin.
“Maya’ nubasanan ‘bersedekah’ om rumapou diolo’ i fakir om mosikin miagal papatahak toluod i potuu kousinan toi babarang kogugunoon tadau-adau.
“Nubasanan miagal diti kopowonsoi ginawo di olidang mogigiyon miampai sunduan opuawang ginawo, olisi om kopurimanan kitonggungan toi opoduli’ kumaa diolo’ di momoguno.
“Mantad dilo’, karamaian tadau raya lobi kirati miampai poposili Aidilfitri sabaagi koiyonon monginggirot pisompuruan om kointutunan koubasanan tinaru,” ka disio kawagu.
Ka wagu di Tun Juhar, id kounsikohan mamaramai Aidilfitri, oinsanan boogian unsubon do tumilombus mamagatang kolubukan di tinimungan koumoligan.
“Kiguno tokou mamagatang om amu’ momolihu kolubukan i winonsoi di mogisusuai boogian kosuul no papasaga’ Aidilfitri aramit id koyuon di otoronong, oulud, ounsikou om aramai, sundung id koyuon di poingonsuhatan.
“Mamaso kogumuan tulun suti’ mamaramai tadau raya, haro wookon mogigiyon i toririmo popoindalan mogisuai karaja’ oponsol om kiguno popoindalan surupukaraja’ 24 jaam sangadau.
“Kalansanan kolubukan diolo’ diti romiton Allah SWT sabaagi ‘amal soleh’ di agayo montok-Dau,” ka disio.
Minomupus pason dau, Tun Juhar om sawo, Toh Puan Norlidah R.M Jasni nogi’ sampaganakan minamason Kounsikohan Tadau Raya Aidilfitri 1445H, Maaf Zahir om Batin.