Dr. Mohd. Arifin (kolimo, wanan) om i Ghulamhaidar (kaapat, wanan) miampai tongo’ mamaramit.
KOTA KINABALU: Pinonuridongan Tabung Balajaran Pogun Sabah (TPNS) kosili posunduran montok papasaga’ lobi kogumu’ tangaanak Sabah kosuul no tinimungan B40 kikosiwatan kumaa kotinanan pinsingilaan akawas.
Inggisaman minonuridong TPNS diti nga’ kopiongoi nogi’ di iso’ mantad tingkananon Hontolon Sabah Maju Jaya (SMJ) ilo’ nopo nga’ mongingkawas kopoburuan ‘modal insan’ om po nogi’ iso’ mantad inggisaman montok popoburu’ ababayan balajaran id pogun diti.
Iso’ Ramai Kinapatahakan TPNS i pinoimagon di Montiri Sains, Tiknologi om Inovasi po nogi’ Ponorikohon Puruankuasa’ Popoindalan TPNS, Datuk Dr. Mohd. Arifin Mohd. Arif pinapanau doid Wisma Bandaraya, Kota Kinabalu di tadau baino’.
Nokotindapou nogi’ id ababayan dilo’ i Potunud Yayasan Sabah, Dato’ Sri Ghulamhaidar Khan Bahadar om puru ngaawi’ Puruankuasa’ Popoindalan TPNS.
