Hajiji (poindikau toguang, kaapat wanan) miampai di Datuk Seri Dr. Joachim Gunsalam, VIP suai om tongo’ tutumanud kurusus.
TUARAN: Boyoon Montiri, Datuk Seri Haji Hajiji Haji Noor minoboros, Koporintaan Pogun pointotopot id koponumboyoan atag ponuridongan Koupisan Kohokiman Kuut Mamasok Pogun Sabah do toun diti.
“Atag ponuridongan Koupisan Kohokiman Kuut Mamasok Pogun Sabah diti nga’ iso’ kosimbanon i papabantug undang-undang adat Mamasok Pogun potilombus dino manahak kokitanan di akawas om kitonggungan kumaa tongo’ Luguan Adat id kuut,” ka disio.
Hajiji minoboros, Koporintaan Pogun poposuul kopio koponsolon kapagarasan Kuut Mamasok Pogun.
“Sonbginan puruankuasa’ pinotomod maya’ Kounsol Hal Mamasok Pogun Sabah (MHEANS) nga’ tinuridong montok ponuridongan, ponimbanan om pogintangan enakmen om ordinan di poinggompit.
“Hal diti nopo montok popoingkawas rontob sistem kohokiman Kuut Mamasok Pogun i kotopong do Kuut Sivil om Kuut Syariah,” ka disio id ramai kinopoimaganan pomupusan kurusus ‘Transformasi Kepimpinan Ketua-Ketua Adat Cemerlang’ id Lintuhun Koubasanan Longkod Rumpun Bajau Samah, Kampung Lok Batik, do hiti, konihab.
Hajiji (koduo, wanan) pinapatahak setifikit kuminaa Luguan Wata Kiulu OKK Kumin Gampai.
Soginumu’ 258 Luguan Adat mantad tolu Luguan Watas, 20 Luguan Mamasok Pogun, 40 Mobi’ Luguan Mamasok Pogun, 194 Molohingon Kampung om songulun Luguan Mogigiyon Cina minongobi’ apat watas Lintuhun Undangan Pogun (DUN) ilo’ nopo nga’ Pantai Dalit, Sulaman, Tamparuli om Kiulu tuminanud kurusus dilo’.
“Luguan Adat kaanu papamanau tonggunan kosudong id kapangahakan, kosokodungan, om mongunsub kapagarasan mogigiyon nokoiyonon. Iti kapasaga’ mogigiyon miampai poinpuli kouhup kumaa ababayan Hontolon Sabah Maju Jaya,” ka disio.
Minanangkabayahan nogi’ isio kumaa Koupisan Hal Mamasok Pogun Sabah (JHEANS) kosuul no Institut Pingludaan Kuut Mamasok Pogun Sabah (ILMAN) tu’ nakalantoi pinapaanjur kurusus diti maya’ sokodung MHEANS om Upis Watas Tuaran, i po nogi’ iso’ laang oponsol kumaa kopotontuan tongo’ momuruan adat oinggonopan do toilaan om korotian montok monoguang kaantaban wagu.
“Iti kouhup nogi’ papatantu’ Undang-Undang Adat Mamasok Pogun toririmo tonudon om pantangon.
“Kalansanan ku koinsanai momuruan adat i nokotindapou kurusus diti do momoguno koinsanai toilaan naanu-anu silihon posunduran popoinggirot adat id kinoiyonon sompoopori.
“Tonggungan do luguan adat om molohingon kampung diti nokoinggayo potilombus dilo’ momoguno komiloon momuruan montok mongimbulai mogigiyon di oulud, otoronong om osompuru.
“Kalansanan ku asil mantad kurusus diti, Kuut Mamasok Pogun Tuaran, Kiulu om Tamparuli silihon do pananda’ rontob (benchmark) kumaa tongo’ Kuut Mamasok Pogun di suai id Sabah doid kopoindalanan kararalano’ di bobos osonong,” ka disio.
Nokotindapou nogi’, Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam; Montiri Koburuon Labus Kakadayan, Datuk Jahid Jahim; Monguhup Montiri Ponombuluyan, Koubasanan om Sandad Posorili’, Datuk Joniston Bangkuai; Ponorikohon Eksekutif Innopriser Corporation Sdn. Bhd., Datuk Jasni Daya i po nogi’ Puru Lintuhun Undangan Pogun (ADUN) Pantai Dalit; Ponorikohon Sabah Electricity Sdn. Bhd., Datuk Seri Madius Tangau po nogi’ Puru Parlimen Tuaran om i Potunud JHEANS, Majaran Osman.
