Dr. Joachim (kotolu, wanan) pinapatahak setifikit kinalantaion kuminaa songulun susumikul cemerlang kinoruhang di Boy (gibang).
RANAU: Ababayan labus mantad kurikulum poinbida’ oponsol id koponuridongan kopomuruanan, ‘kreativiti’, om sunduan misokodung id nayatan susumikul, ka di Kumoduo Boyoon Montiri II, Datuk Seri Dr. Joachim Gunsalam.
Suai ko ilo’ ka disio, ilo’ po nogi’ nga’ kapatanom pogoyuon sopitimbang-timbang, kopogi’isaan om kogiroton pisompuruan id nayatan susumikul.
“Maya’ kopiisaan koponigampot tokou kalantaion di lobi kagayo,” ka disio ontok pinopoimagon Ramai Apresiasi Kecemerlangan Kokurikulum om Surupukaraja’ Bakti Hal Susumikul SMK Mat Salleh 2023 id Sikul Mananga’ Kabansaan (SMK) Mat Salleh, do hiti, di tadau Kaapat katatalib (ko 25tw Koiso’).
Dr. Joachim po nogi’ Montiri Koporintaan Koiyonon om Pomuwalaian minamarayou nogi’ kinopongonjuran ramai kopongunsikohan miagal diti tu’ okon nopo ko’ iso’ ababayan kapamagatangan, nga nogi’ iso’ inggisaman po’ompus montok mongimbulai sinakagon di aadas mantad sunduk kinoinanon, ginawo, pomusarahan om kopurimanan.
“Monuridong tokou do susumikul i mamagatang bakat om seni miampai amu’ momuntuk tinaru, nogi’ posuni ginawo kitonggungan kumaa kolidasan tinan om tutok maya’ ababayan olidas.
“Id timpu miagal, ababayan nopo diti montok popotungag koponuridongan komilaan mooboros, miagal komilaan pibabarasan miampai mogigiyon. Piromutan di osonong koponguhup susumikul maganu nawawaya’an om toilailaan di agayo, kapasaga’ diolo’ sumili tulun di abaal om kitonggungan,” ka di ADUN Kundasang dilo’.
Minonongkounsikou nogi’ isio kumaa tongo’ mongingia’ om molohing i pinopokito tinonggungan poiponu’ ginawo minomoluda’ om minangahak tongo’ susumikul, minoboros isio, pingludaan kokurikulum do kososolugan poindalanon id labus timpu sinikulan om mantad dilo’, nung aiso’ sokodung om ponudukan tongo’ mongingia’ om susumikul di poinhompit apagon montok mamagampot rontob i nosigampot diolo’, miagal i rinamai doid ababayan dilo’.
“Kumaa oinsanan susumikul i potuu nakaanu pongunsikohan toi amu’, tikid tadau nopo nga’ kosiwatan wagu montok dokoyu sumikul lobi kosonong ko’ mantad pogulu dilo’. Potonomon sunduan montok mumang buru’, sabab kalantaion mimpuun di angkab om inggisaman di atatap. Isai i minggisom tantu’ do kalantoi,” ka disio.
Nokotindapou nogi’ i Kumoduo Upisor Balajaran Watas, Siktor Pamalanan, Upis Balajaran Watas Ranau, Foo Lee Yen; Molohingon Sikul SMK Mat Salleh Ranau; Boy @ Sharif Fuad Francis; Monguhup Totuo Kokurikulum, Po nogi’ Ponorikohon I, Ramai Apresiasi Kecemerlangan Kokurikulum om Surupukaraja’ Bakti HEM 2023, Hillary Pulo Simeon Kalang om tongo’ molohing susumikul.
