Hajiji om naalap suai guminambar miampai Puru Puruankuasa’ Lansanon Piomungan Koisaan-Koisaan Foochow Sabah om W.P Labuan id Ababayan Makan Totuong Kapamaramaian Toun Wagu Sina 2024 om Ababayan Angkat Sumpah Puruankuasa’ piomungan dilo’ id Wisma Hakka, Kota Kinabalu di kosodop.
KOTA KINABALU: Piomungan Tongo’ Koisaan Foochow Sabah om Labuan i noondo diti pasanganu 11 puru poingamung nunsub tumonggoi monguhup inggisaman koporintaan popoburu’ Sabah.
Boyoon Montiri (KM), Datuk Seri Haji Hajiji Haji Noor minoboros, mogigiyon Foochow agayo kinouhupan kumaa kinopoburuan ikonomi pogun Sabah maya’ pidagangan om pongindopuan.
Kohondot dilo’ kalansanan disio mogigiyon Foochow tumilombus minggisom montok mamagampot naangayan osonong id mogisusuai kaganaan di aampai, lolobi no id koponguhupan mononduli’ ikonomi talib tomporuruol Covid-19.
“Mokimokito oku Piomungan Koisaan-Koisaan Foo Chow Sabah om Watas Pisompuruan Labuan popowonsoi do lobi po kogumu’ om tumilombus monokodung inggisaman Koporintaan Pogun montok mononduli’ ikonomi pogun diti, kaampai no papalantoi palan kopoburuan Hontolon Sabah Maju Jaya (SMJ),” ka disio.
Hajiji (wanan) tuminabi’ di Presiden Piomungan Koisaan-Koisaan Foo Chow Sabah om Watas Pisompuruan Labuan, Datuk Wong Kii Yii id Ababayan Makan Totuong Kapamaramaian Toun Wagu Sina 2024 om Ababayan Angkat Sumpah Puruankuasa’ Kopomuruanan (2023-2025) piomungan dilo’ id Lintuhun Port View Palace, Wisma Hakka, Kota Kinabalu di kosodop.
Minoboros isio dilo’ id Ramai Makan Doungotuong Kapamaramaian Toun Wagu Sina 2024 om Ababayan ‘Angkat Sumpah’ Puru Puruankuasa’ Kopomuruanan (2023-2025) Penggal Ko-4, Piomungan Tongo’ Koisaan Foochow Sabah om Watas Pisompuruan Labuan id Lintuhun Port View Palace, Wisma Hakka, do hiti di kosodop.
Hajiji minoboros, piomungan diti nopo nga’ wookon kotinanan mogigiyon Sina’ bobos agayo id Sabah i nokopotimung mogisusuai ginaras kaanu tumilombus monginggirot pisompuruan kosuul no id nayatan puru om mogihup mogowit koburuon om kosimbanon okon nopo ko’ kumaa mogigiyon Sina nga’ mogigiyon Sabah do poinpuli.
Ka disio, Koporintaan Pogun toririmo manahak sokodung kumaa koinsanai koisaan amu’ momuntuk tinaru om ugama’ mooi do kaanu misokodung miampai koporintaan do popoburu’ mogigiyon om pogun diti.
Minoboros isio, Koporintaan Pogun nga’ toririmo nogi’ poposotol kaadangon om kaadason id koinsanai sunduk nogi’ toririmo monguhup mogigiyon dau amu’ monompini’ tinaru om ugama.
“Iti atalang sabab id Bajet Sabah toun 2024, Koporintaan Pogun pinopoobi’ soginumu’ RM56.75 riong montok kopoburuan tongo’ tinan kougamaan okon Islam, sikul mission, sikul ponit kabansaan om mimpoopori,” ka disio.
Hajiji suminasi ababayan tuminaru Puru Puruankuasa’ Lansanon Piomungan Koisaan-Koisaan Foochow Sabah om W.P Labuan id Ababayan Makan Totuong Kapamaramaian Toun Wagu Sina 2024 om Ababayan Angkat Sumpah Puruankuasa’ piomungan dilo’ id Wisma Hakka, Kota Kinabalu di kosodop.
Hajiji minoboros, sunduan pisompuruan nopo nga’ posunduran kinalantaion mogigiyon Foochow id mogisuai kaganaan.
Om nogi’ Foochow nointutunan sabaagi mogigiyon i otoboi nogi’ kikomilaan id pongindopuan miampai nokogompit doid siktor pamansaian, kopoburuan hartanah, kogogonopan, pomukobunan, kotolunan, farmasi om nogi’ surupukaraja’ abaal, ka disio kawagu.
Minoboros isio, somok om oinsnaan kaganana di natanud om naampai do mogigiyon Foochow, potilombus dino kapanahak waya’ kumaa kopoburuan om komogoton ‘fizikal’ om modal insan id Sabah.
“Yolo’ nakalantoi minongimbulai tongo’ mongingindapu’ nointutunan om tinimungan abaal di kiginoris. Kinaparagaton, kinalantaion om nubasanan karaja’ di tongo’ mogigiyon Foochow apatut ombitanan di tongo’ suai tinaru id pogun diti,” ka disio.
