Haji Hajiji Haji Noor
KOTA KINABALU: Koporintaan Pogun poposodia’ pomorisaan kolidasan aiso’ kabayar montok mogigiyon id pogun diti, ka di Boyoon Montiri, Datuk Seri Haji Hajiji Haji Noor.
“Kabinet Pogun nakaakun montok popoindalan surupukaraja’ dilo’ id siriba’ kaganaan kuasa’ Komontirian Koburuon Mogigiyon om Kasasanangan Mogigiyon.
“Ontok timpuunon, poindalanon ilo’ id 10 watsa,” ka di Hajiji, i pinopoilo do poindalanon ilo’ maya’ surupukaraja’ maapanau momoguno van pinotomod i noinggonopan do kakamot pongubatan doun kaawagu montok rumikot id koiyonon labus kakadayan.
Minoboros isio dilo’ id mitingan talib kabinet Koupisan Boyoon Montiri id Menara Kinabalu, do hiti, di tadau baino’.
Naamot dilo’, minoboros i Boyoon Montiri, Kabinet pinopolulus nogi’ ponuridongan Kounsol Lojistik Sabah.
“Kounsol Lojistik Sabah id siriba’ kaganaan kuasa’ Komontirian Karaja’ Agayo monirisid ponuridongan katatapan, koponguludan om kopiantangan hal lojistik id Sabah,” ka disio.
Hajiji minoboros, Kabinet id mitingan dilo’ id tadau baino’ kaakun nogi’ papasaga’ pomogunaan kogogonopan pomonsoi ‘konvensional’ (noubasanan) piadangon di Sistem Ponuridongan Kipomorunan (Sistem Binaan Berindustri – IBS) montok ponuridong Walai Mesra SMJ.
Ka disio, wookon intodonon kinoloidon momongo Walai Mesra SmJ nopo nga’ kuntiriktor amu’ kaanu popoindalan projik momoguno kogogonopan IBS mantad no do gatang dau.
“Miampai popoinluhau kosudongan, kalansanan dahai ponuridongan Walai Mesra SMJ lobi kosikap,” ka disio i pinopoilo do pomomonsoi (reka bentuk) Walai Mesra SMJ maan tilombuso’.
Boyoon Montiri minoboros, Kabinet nga’ minanahak nogi’ kapasagaan montok monginsonong rontob ningkakaton Paitan om Sook sumili watas poinponu’.
