Masidi pinopoindalan ponokotanda’ koubasanan popoungkalat singa miampai di Dr. Roland om poingintong i Liew.
KOTA KINABALU: Koporintaan Pogun pinopotoluod tulu singa kuminaa mogisusuai kuil om koisaan Cina id pototongkop Sabah montok toun kumaapat otuntud kopihondot Toun Wagu Cina di rumikot.
Boyoon Montiri, Datuk Seri Haji Hajiji Haji Noor minoboros, Koporintaan Pogun pinopoobi’ RM1.5 riong montok tuduan dilo’ do toun diti.
Hajiji nobian di Montiri Kousinan, Datuk Seri Masidi Manjun pinapatahak tulu singa kuminaa kuil om koisaan sompoopori id zon tanga’ Tisan Kotonobon id ababayan kinapatahakan i pinapanau doid Longkod Konvensyen Sompomogunan Sabah (SICC) do hiti di baino’.
Ababayan dilo’ ponokotanda’ kinoponimpuunan toluod diti, pohoroon nogi’ id siam zon suai doid pogun diti dumontol kapamaramaian Toun Wagu Cina.
Zon nopo ngaawi’ dilo’ nga’ Beaufort/Sipitang, Kudat/Kota Marudu, Keningau, Tenom, Tawau/Semporna, Sandakan, Lahad Datu, Ranau om Kota Belud.
Nokotindapou nogi id ababayan kinapatahakan dilo’ i Montiri Koburuon Mogigiyon om Kasasanangan Mogigiyon, Datuk James Ratib, Presiden Lintuhun Pongindopuan Cina Bersatu Sabah, Tan Sri Andrew Liew; ponorikohon manganganjur Datuk Dr. Roland Chia; Konsul Jeneral Cina id Kota Kinabalu, Dr. Huang Shifang; Konsul Jeneral Jipun id Kota Kinabalu, Yamashita Yoshito; tongo’ mongongobi’ mogigiyon om momuruan mogigiyon Cina.
