Karaja’ kopongundaran Ralan Kampung Jaya Baru, Kinabatangan.
KOTA KINABALU: Potunud Koupisan Karaja Agayo (JKR) Sabah minonuhu’ do bohogian konsesi montok popogura’ tinimungan karaja’ om misin karaja’ montok popoindalan karaja’ ngaawi’ kopongundaran di poinpatut di Ralan Kampung Jaya Baru id Kinabatangan mooi do koyuon ralan dilo’ lobi oumolig montok gunoon.
Montiri Karaja’ Agayo, Datuk Ir. Shahelmey Yahya minoboros dilo’ ponimbar di ponguhotan karait koyuon talun-alun naraag di komoyon.
Pinopoilo isio do nakapaharo pinibabarasan miampai di Potunud JKR konihab karait hal dilo’.
“Montok kopoilaan ginumuan, talun-alun Kg. Jaya Baru dilo’ nopo nga’ poinsuang id Ralan Agayo Pan Borneo i maan insanangai pikikiro kotimpuun do toun diti.
“Koyuon do ralan dilo’ mimang do araat om otonduli’ nopo miampai kopoindalanan karaja’ monginsonong miampai poinggayo (maya’ kopoindalanan projik Ralan agayo Pan Borneo do obontol). Koyuon tawan di asagub gama-gama’ timpu gumompus miampai ginumu’ trafik di akawas kotilombus kapanahak karaagon kumaa koyuon ralan i alaid no nakatalib mantad timpu pomowonsoi dau (oromuk).
“Sundung ingkaa, naamot mindad kotimpuun pakej Ralan agayo Pan Borneo dilo’, bohogian JKR maya’ konsesi di sinili sinuhu’ montok popoindalan karaja’ ngaawi’ koponginsonongan om kopongundaran di poinhompit,” ka disio id kointalangan di baino’.
Shahelmey minoboros, nokopokianu nogi’ disio i Potunud JKR mokianu sokodung koinsanai injinior watas om injinior koponginsonongan ralan nogi’ tongo’ komponi konsesi koponginsonongan ralan do toririmo aparagat do miontong koyuon tongo’ ralan id siriba’ pitamangan diolo’ do po’ompus timpu.
“Tongo’ ruputan mositi’ toririmo oinwoguan montok tuduan koponguludan om kogunoon mongupalai kousinan pomoruhang nung kohimpogong no ilo’ do karaja’,” ka disio.
