Hajiji (poindikau, kaapat gibang) om i Juliah (poindikau, kaapat wanan) guminambar pongingitanan miampai wookon tombului.
TUARAN: Koburuon om komogoton nonuan koposuulan katalib minomuruan koporintaan, miampai mogisusuai laang om koburuon nowit montok no koundaran mogigiyon id pogun diti, ka di Boyoon Montiri, Datuk Seri Haji Hajiji Haji Noor.
Isio po nogi’ Puru Lintuhun Undangan Pogun (ADUN) Sulaman minoboros, sundung haro bohogian atantu’ i amu’ orohian om asaru’ mingkumpilin disio, nga’ yolo’ dilo’ komilo nopo do mimboros.
“Amu’ oku monompuan hal di kapataam timpu montok monimbar toi mimboros nopo do pulitik. Nga’, tilombuson ku moningkanan karaja’ om tonggungan di pinoowitan montok koundaran mogigiyon.
“Sabah ilo’ do otopot no, orohian oku ababayan miagal diti tu’ pirubaan di osimbayan miagal diti kapasaga’ doho’ rumuba’ do mogigiyon kosuul no id watas Tuaran.
“Oilaan ku soira’ sinili suminili Boyoon Montiri, tonggungan ku nokoinggayo nung piadangon di pogulu diti. Nuru’ oku momusorou montok koponsolon iso’ Sabah. Nga’ iti okon ko’ kohimpogong doho’ do amu’ rumuba’ mogigiyon id koiyonon,” ka disio.
Hajiji (kaapat, wanan) om i Juliah (kotolu, gibang) tinanud di Molohingon Kampung Pandamai po nogi’ Ponorikohon Manganganjur, Sylvia Belinggi (kaapat, gibang) pinopoindalan kopomutulan kek id ababayan dilo’.
Minoboros isio dilo’ ontok pinopoimagon Ramai Santuni Rakyat kopihondot Pamaramaian Tadau Natal Piomungan Kampung BBKWDP 2023 (Batangan, Barus, Korompitut, Wokok, Dungang 1, Dungang 2 dan Pandamai) id Lintuhun Poingukab Sapai Teo, Kampung Dungang, do hiti di tadau baino’.
Nokotindapou nogi’ sawo disio, Datin Seri Hajah Juliah Salag.
Hajiji minoboros, soira’ haro timpu osimbayan, orohian kopio isio ramai miagal diti om katangkangahon okon ko’ padaahan do amu’ rumuba’ do mogigiyon kosuul no id Tuaran om koiyonon disio doid Sulaman.
Hajiji (koduo, wanan) om i Juliah (kotolu, wanan) monongkirumo dilo wookon mogigiyon om tulun nolohing i nokotindapou doid ababayan dilo’.
“Sundung amu’ asaru’ do koruba’ nga’ ginawo om kopurimanan ku osomok kopio do mogigiyon id watas diti. Kohondot dilo’, nung haro kopomogunaan, poiloon oku, kada’ koikumai,” ka disio.
Karait do ramai dilo’, Hajiji minoboros, ababayan walai poingukab tikid karamaian miagal Krismas kopoinggirot piromutan mogigiyon orukut tinaru om ugama’ id pogun diti.
Ka disio, ramai miagal diti nga’ kopogirot nogi’ piromutan do laqnsanon om mogigiyon.
“Karamaian miagal diti no i nokoponuridong mogigiyon orukut tinaru om ugama’ id Sabah kaampai id Tuaran, poinpasi id koyuon di oulud om osompuru sundung pia id kopogisusuaian tinaru om kotumbayaan ugama’.
“Iti no kinoubasanan i notungkusan tokou mantad komolohingan om iti no kinolumison pogun Sabah. Aiso’ koimbulai kobolingkahangan kapaampai ugama toi tinaru, haro nogi’ i mogiobpinai sundung misuai ugama’.
“Miagal di tangaanak ku, haro pinsan diolo’ i kiugama’ Kristian. Nga’ oinsanan dilo’ amu’ kaantob dati’ do masi id koyuon di oulud,” ka disio.
