Haji Hajiji Haji Noor
KOTA KINABALU: Koporintaan Pogun pinopoobi’ RM56.75 riong montok kopoburuan tongo’ tinan kougamaan okon Islam, sikul mission, sikul ponit kabansaan om mimpoopori, montok toun 2024.
Boyoon Montiri, Datuk Seri Haji Hajiji Haji Noor minoboros, kinopoobian dilo’ kalansanan kopomogonop wookon di kopomogunaan kousinan montok manampung kos kopoindalanan tadau-adau suai ko’ popoindalan ababayan poinggompit nogi’ monginsonong kotinanan om tinan kougamaan sompoopori.
“Kinopoobian diti kopiongoi di tonggungan Koporintaan Pogun i toririmo poposotol kaadangon om kaadason id koinsanai sunduk nogi’ monguhup mogigiyon dau amu’ momuntuk tinaru om ugama’.
“Kinopoobian do toun tiso’ dilo’ nokoinsawat nung piiradon di RM54.05 riong di toun diti,” ka disio ontok ababayan pamaramaian Walai Poingukab Krismas Anglikan id Wisma Anglikan, do hiti di tadau baino’. Teks boboroson disio binasa’ di Monguhup Montiri kumaa Boyoon Montiri, Datuk Abidin Madingkir.
Hajiji minoboros, Koporintaan Pogun toririmo mongunsikou koponsolon koinsanai kararamaian montok monginggirot po do sunduan doun tokou, poposuni kopurimanan oulud om otoronong nogi’ pisompuruan id sunduk kopogisusuaian koubasanan nogi’ tinaru id pogun diti.
“Kapamaramaian Krismas diti kopokito songkuro pomogunon diti mamagatang tikid tonggungan om kinouhupan di pinatahak do tikid mogigiyon dau i opokitanan maya’ ginirot pisompuruan doid nayatan mogigiyon mogisuai tinaru id pogun diti.
“Ilo’ pogi’ do pisompuruan toririmo posuulon tu’ miampai miiso’ ginawo do koponuridong tokou songinan pomogunon di oulud om mogigiyon dau toririmo poposuul pisompuruan, pulitik di amu’ agagut, nogi’ ikonomi di osonong om kopongimbayat kororohian mangangapu’ labus.
“Id pipiro pomogunan, pigogutan pogialatan tinaru lolobi no kapaampai ugama’ nokoowit pisangadan di po’ompus potilombus dino nakaantob kopoburuan ikonomi, sosial om nogi’ pulitik pogun dilo’. Mantad dilo’ amu’ tokou mimang hal miagal dilo’ aantakan id pomogunon tokou,” ka disio.
Minamarayou nogi’ isio inggisaman Gereja Anglikan Sabah i okon nopo ko’ minonilombus nubasanan papaharo Walai Poingukab Krismas nga nogi’ magalap mogigiyon mogisuai tinaru om ugama’ do mamung mamaramai kararamaian diti.
“Amu’ olimon, do Gereja Anglikan Sabah ogumu’ kinouhupan kumaa pininuridongan pomogunan (nation building) id Sabah.
“Ogumu’ lalansanon pogun om tokoh kikalantaion id mogisuai kaganaan i nokoimbulai maya’ balajaran di osonong do tongo’ monunuduk kitonggungan i poingkaraja’ id sikul mission pointonod pogulu kinoponuridongan Pisompuruan Malaysia.
“Kalansanan ku pisokodungan miampai tongo’ gereja id Sabah, kaampai Gereja Anglikan Sabah kotilombus montok monuridong songinan pomogunan di koburu’ om oulud, montok komogoton om kasasanangan koinsanai mogigiyon Sabah,” ka disio.
