Jauteh (gibang) pinapatahak tandamato kuminaa di Shahelmey.
PUTATAN: Pisokodungan id pialatan koupisan om kotinanan koporintaan oponsol montok manalob koulalaho’ pongudutan id piromutan toi ‘scammers’.
Kumoduo Boyoon Montiri III po nogi’ Montiri Karaja’ Agayo Datuk Ir Shahelmey Yahya minoboros, koporintaan do po’ompus timpu toririmo misokodung miampai koupisan poinggompit montok papatantu’ koulalaho’ scammers aanu manalob suai ko’ manahak kopurimanan kumaa mogigiyon.
“Sundung ingkaa, ilo’ nopo nga’ iso’ kaantaban sabab scammers nga’ kitakal nogi’ id kopoindalanan pongudutan diolo’.
“Mamason oku kumaa mogigiyon mooi do mau’ obingudutan di pomolulugut toi ko’ takal-akal scammers i momoguno nogi’ kinosonongon tiknologi digital do noondo diti,” ka disio ontok rinubaan media katalib pinopoimagon Ababayan Townhall Discussion om Karnival Koumoligan Talun-alun Toun 2023.
Shahelmey pinolombus nogi’ kalansanan mooi ababayan miagal diti aanu monilombus sabab kosili pawaya’an piromutan misulak di kiwaya’ id pialatan koporintaan om mogigiyon miampai mitilombus.
“Oponsol montok koporintaan miampai koupisan kitonggungan misokodung om miilang kointalangan montok papatantu’ rontob kopurimanan nogi’ kosodingon mogigiyon di koulalaho’ scammers,” ka disio.
Id ababayan sangadau pinaanjur Pulis Diraja Malaysia Kontinjen Sabah id Lintuhun Sri Putatan dilo’, Shahelmey minamason kumaa tulun ginumuan mooi do tumonggoi popoindalan tonggungan mogigiyon opoduli’ id koponoibahan om kapanamangan pomogunaan sada’ dadah id nayatan mogigiyon.
Nokotindapou nogi id ababayan dilo’ i Pesuruhjaya Pulis Sabah, Datuk Jauteh Dikun om Timbang Canselor Univositi Malaysia Sabah, Profesor Datuk Dr. Kasim Mansur.
