Dr. Joachim Gunsalam
KOTA KINABALU: Sabah nokoposurat soginumu’ 984 kes Covid-19 id suang timpu sominggu’ gisom tadau Ko’onom katatalib (16tw Kohopod om Duo) minimpuun ko 10tw Kohopod om Duo.
Iti nopo nga’ kinoingkawason soginumu’ 356 pihatus nung piadangon di 216 kes nokosurat di sominggu pogulu dilo’ (ko 3-9tw Kohopod om Duo).
Ka di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam, iso’ kes kinapataion pinoruput id Kota Kinabalu suang timpu ko 10-16tw Kohopod om Duo dilo’.
Isio po nogi’ Montiri Mongungulud Covid-19 Sabah minoboros, 21 watas nokoposurat kinoingkawason ginumu’ kes minggu nakatalib nung poiradon minggu pogulu ilo’ nopo Kota Kinabalu, Penampang, Tuaran, Putatan, Kota Belud, Papar, Beaufort, Sandakan, Lahad Datu, Keningau, Kota Marudu, Sipitang, Telupid, Tawau, Semporna, Tambunan, Pitas, Tenom, Kudat, Kinabatangan om Tongod.
Naamot iso’ watas nokoposurat kinoinsiribaon di minggu nakatalib ilo’ nopo nga’ Beluran, om duo watas nokoposurat kes au nokosimban, ka disio, i pinopoilo do iti kapaampai Ranau miampai sinuratan apat kes om Kuala Penyu miampai nokosurat tolu kes.
“Naamot apat watas di suai amu’ nokoposurat nunu-nunu kes montok minggu diti. Iti nakapaampai watas Nabawan, Kunak, Beluran om Kalabakan,” ka disio id kointalangan di songkosodop.
Dr. Joachim minamason tulun ginumuan montok mnaanud kapanamangan koburusion tinan id rontob di bobos akawas miagal minsaru’ mongoug longon id kopongilagan kopogkorolihan Covid-19.
Ka disio, kapamakaian tokop rongus id koiyonon rubpuon ginumuan kumaa diolo’ i poinbanta’ om yolo’ i kitanda-tanda nopo nga’ pounsubon kopio.
“Kumaa diolo’ i amu’ po nakaanu dos primer vaksin om dos pongunsub vaksin, montok tuduan monginkuri’ kaantakan kopogkorolihan, pokionuon kou do rumomut do Klinik Kolidasan di poinsomok.
“Kumaa diolo’ i poinbanta’, unsubon kou maganu pongusapan ‘antiviral Paxovid’ i aanu doid kolinik kolidasan sosomok.
“Tonudon TRIIS (Test, Report, Isolate, Inform om Seek) nung haro no tanda-tanda’ Covid-19,” ka disio.
Montok koponguludan romut osomok, bohogian KKM pinapalabus ponuhuan (poinggirotkuasa’ ko 22tw Kaapat 2023), hinombo montok romut osomok di kitanda, laang kopongiagalan kiguno onuon suang timpu 5 tadau mantad kinoompokon kinapabantan kumaa kes positif Covid-19.
Naamot montok romut osomok di kitanda’, suhuon do popoindalan kuarantin sondiri om unsubon montok mindalan poniisan RTK-Ag sondiri ontok tadau kinoimpuuon tanda om ontok tadau kotolu.
“Tulun ginumuan pokionuon montok toririmo mananud di ponuhuan KKM do po’ompus timpu montok mongilag kotongkopan Covid-19,” ka disio.
