Rafie popingigit gaa’ Asia Honesty Enterprise Awards 2023.
KOTA KINABALU: Longkod totombuluyon nokoiyonon Sabah, Taman Bandukan Riverside Resort Sdn. Bhd. (TBRR) nakaanu kopongokunan sabaagi mamaramit gaa’ Asia Honesty Awards (AHA) id bohogian Asia Honesty Enterprise Awards 2023.
Potunud Koponguludan TBRR, Rafie Robert minongobi’ kotinanan dilo’ minamaramit gaa’ kibantug dilo’ id ramai kinapatahakan AHA ko 11 i nakapanau id The Majestic Hotel, Kuala Lumpur, di tadau Kolimo, katatalib.
Asia Honesty Award nopo nga’ gaa’ i mangakun naangayan agayo montok pongindopuan, kotinanan om minsosongulun. Kituduan ilo’ do mongintutun tonggungan id sosonginan kotinanan doid pototongkop Asia.
AHA nopo nga’ iso’ mantad 4 ramai kapamaga’an kitopong sompomogunan id siriba’ iso’ mantad koisaan mongindapu’ bobos agayo id Asia, ilo’ nopo nga’ Asia Excellence Enterprise Federation (AEEF) i tinuridong di Prof. Dato’ Sri Paduka Dr. Robin Tan po nogi’ Presiden HWT Group Berhad.
Tikid toun, AEEF mamaramit lobi mantad 1,000 kotonudan i kapaampai mantad mongindapu’ om pongindopuan Asia montok pamaga’an dilo’.
Kumoduo Montiri Koburuon Mongindapu’ om Koperasi Malaysia, Senator Saraswathy Kandasami pinopotunui gaa’ kopongokunan idlo’ kuminaa di 61 mongindapu’ om pongindopuan di nopili’.
Minanangkabayahan isio kumaa mongindapu’ om pongindopuan i nakaramit gaa’ pongokunan AHA diti baino’ om lumansan diolo’ kotilombus kopokito naangayan osonong id timpu obontol.
Daamot dilo’, Rafie minoboros, kinapamaga’an diti baino’ kosili impuunon montok tumilombus popoburu’ om popoinggayo TBRR kumaa lobi kalantoi do timpu dumontol.
“Toririmo tokou poposuul kosontoban moomougno om kinotulidon id kopoindalanan pongindopuan. Ga’a diti mangakun TBRR sabaagi kotinanan pongindopuan di otulid om kitonggungan id nayatan puru pongindopuan Asia,” ka disio.
