Haji Hajiji Haji Noor
KOTA KINABALU: Koporintaan Pogun mamagatang kopio tonggungan Kounsol Datuk Pogun Sabah (MDNS) montok monginggonop inggisaman poposindak kasasanangan mogigiyon id siriba’ angkab kopoburuan Hontolon Sabah Maju Jaya.
“Koporintaan Pogun mamagatang tonggungan MDNS om kotinanan suai i iso’ hontolon montok momogonop inggisaman dau. Kalansanan ku inggisaman MDNS montok momonsoi kosimbanon kotilombus kapanahak waya’ di po[‘ompus kumaa koinsanai mogigiyon,” ka di Boyoon Montiri, Datuk Seri Haji Hajiji Haji Noor id Sodop Penaung i pinaanjur do MDNS kopihondot kinouliton toun pinotomod ko-70 Di Molohingon Pogun Sabah, Tun Juhar Mahiruddin id Magellan Sutera di songkosodop. Boboroson disio binasa’ di Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Takanon, Datuk Seri Dr. Jeffrey Kitingan.
“Agayo kounsikohan ku soira’ nokoilo MDNS masaan monuridong projik ponimpuun pomutanaman organik id siriba’ Tonggungan Sosiol Mogigiyon (CSR) do monguhup mogigiyon Kampung Purak id Papar minsingilo om kaanu komilaan id pomutanaman organik.
“Ilo’ okon nopo ko’ kosili aset kumaa diolo’ nga’ tohuri nopo kouhup diolo’ maganu nindopuan om kosukupan tinan kumaa mogigiyon kampung miagal di noroitan di Datuk Claudius Roman (Presiden MDNS) id boboroson dau,” ka disio.
Sundung pia songinan kotinanan okon koporintaan di okoro’, Boyoon Montiri nga’ ounsikou nogi’ nokoilo do MDNS aparagat pinapapanau ababayan pointonod pipiro toun nakatalib, pinopoindalan tongo’ ababayan montok monguhup mogigiyon di momoguno, kaampai no karaja’ doun mogigiyon ontok kinopogkorolihan tomporuruol Covid-19.
“Inggisaman tokou doid koposimbuatan konosipan diolo’ i momoguno ponguhupan nopo nga’ arayou. Mininsomok kou do tangaanak yatim, komulakan om tulun nolohing, nogompitan kinotutudan, Sikul Henry Gurney, songinjiil, tulun bolou id mogigiyon tokou, komulakan aiso’ karaja’, mogigiyon kampung om tinimungan miampai pinopotoluod do ponguhupan kousinan, takanon, surupukaraja’ kolidasan, posokoton, kasut om babarang id koiyonon poonsokid om nogi’ minanahak kosiwatan kumaa di amu’ songkuro kinonosipan montok minonguhup diolo’ monilombus koposion.
“Miampai pinopo’iliu palan montok maganu laang, MDNS ototopot nokopokito kuasa’ tonggungan, kinoponuon ginawo om karaja’ tiim,” ka disio.
