Dr. Jeffrey (wanan) miampai di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam id pitimungan DUN Sabah.
KOTA KINABALU: Sabah momoguno soginumu’ RM10 bilion montok momoruhang kopolobusan asil parai montok papaanu rontob kosukupan tinan (SSL) watas id pogun diti koingkawas kumaa 60 pihatus.
Tumanud Utusan Malaysia, Kumoduo Boyoon Montiri I po nogi’ Montiri Pomutanaman, Ponginsadaan om Pomorunan Takanon, Datuk Seri Dr. Jeffrey Kitingan minoboros, kopoobian agayo dilo’ kiguno montok koposodiaan misin pangaradu om pongomot, kopoburuan kogogonopan nogi’ subsidi mamaradu.
Minoboros isio, tumanud pinongikiraan di winonsoi, soginumu’ RM33 riong gunoon montok misin pangaradu om pongomot; RM1.2 riong gunoon montok kopoburuan kogogonopan; RM4.6 riong montok subsidi mamaradu, ‘input’ om kadagangan nogi’ RM4.18 riong montok kopongukaban Semenanjung Dent.
Minoboros isio dilo’ id boboroson pomupusan Komontirian Pomutanaman, Ponginsadaan om Pomorunan Takanon id pitimungan Walai Undangan Pogun (DUN) Sabah, do hiti di tadau Kotolu.
Dr. Jeffrey minoboros, komontirian dilo’ nga’ pointotopot id kopotilombusan inggisaman montok mongingkawas kopolobusan parai miamapi papagaras ababayan di poinharo mantad miagal tongo’ ababayan id siriba’ kopoindalanan Watas Koburuon Pomutanaman Bersepadu (IADA), subsidi kapadangan parai do PadiBeras Nasional Berhad (Bernas) om kapanahakan input do Lembaga Kotinanan Momukabun (LPP).
Noondo diti, SSL wagas id Sabah id ronotb no do 22 pihatus om i nopo lobi dilo’ nga’ tumalahan kumaa wagas nudar.
Id timpu diti, Koupisan Pomutanaman Sabah kogompit no id kapanahakan insentif kopongoroduan montok ranahon parai id suang om labus ‘jelapang’ miampai gatang RM494 sonhektar.
Tumanud disio, kopolobusan parai om watas id Sabah osisiriba’ nosusuhut kogumuan momumutanom mananom parai tumanud doun kinoubasanan montok kogunoon sondiri om okon ko’ montok tuduan komersial.
Suai dilo’, naantakan pisahapan pomogunaan tana’ montok koburuon pomorunan nogi’ pomuwalaian id watas kakadayan om piduaan kosongonuan t ana’ i nokoowit ginayo lot tanaman parai nokoingkoro’. Om nogi’, kogogonopan sistem pomuwoigan id ranahon nga’ amu’ po songkuro kosonong.
“11,000 hektar no ranahon momoguno sistem pomuwoigan K1 ilo’ nopo nga’ sistem pomuwoigan om poluluyungan di osonong, nga’ amu’ korungod nung piadangon di 7,000 hektar montok K2 (sistem pomuwoigan om poluyungan di kosontob) om 6,000 hektar montok K3 (intodonon waig mantad rasam).
“Suai ko ilo’, kapangabaan baja om pamawanit nga’ amu’ tumanud timpu nakatantu’ nogi’ amu’ poinggonop,” ka disio.
