Haji Hajiji Haji Noor
KOTA KINABALU: Koporintaan Pogun mamaramit kootusan Koporintaan UK montok minongolon pason pamanahan dau montok Mamasok Britain i tumombului kumaa Sabah.
Id kinopomoromitan kootusan dilo’, Boyoon Montiri (KM), Datuk Seri Haji Hajiji Haji Noor i po nogi’ Ponorikohon Kounsol Koumoligan Pogun minoboros, Sabah nopo nga’ koiyonon di oumolig montok rikoton om mongindapu’.
“Nosusuhut pinogintongan koumoligan kaawagu do Kounsol Koumoligan Malaysia, Komontirian Suang Pogun om Koporintaan Pogun Sabah, Tinimungan Pulis Diraja Malaysia minanahak jominan do rontob koumoligan id Sabah kakal pointamong.
“Ponuhuan moguung ginayat kawagu. Sabah nopo nga’ koiyonon di otungolig montok tombuluyon om montok mongindapu’,” ka disio i minoboros lobi 150,000 tutumombului labus i tuminombului tisan kosilahon Sabah mantad wulan Koiso’ gisom Kosiam toun diti.
Miampai kootusan Koporintaan UK, Boyoon Montiri lumansan lobi kogumu’ mamasok Britain tumombului doid Sabah.
Kalansanan disio pomogunan suai i pinapalabus pason pamanahan momit do kootusan Koporintaan UK.
Pesuruhjaya Takawas British kumaa Malaysia id iso’ kointalangan minoboros, kinoponginwoguan dilo’ nopo mantad pinogintongan osorisid do Upis Labus, Komanwel om Koburuon UK (FCDO) i minongobi’ kinosimbanon agayo kumoiso’ kumaa pason pamanahan UK montok Sabah pointonod 2013.
