Menara Kinabalu
KOTA KINABALU: Kootusan Koporintaan Pisompuruan minanahak kosuangon 30 tadau aiso’ visa kumaa Malaysia mantad China om India mimpuun ko 1tw Kohopod om Duo 2023 nopo nga’ ponokotanda’ osonong rikoton Sabah 2.2 riong korikotan toun diti.
Boyoon Montiri (KM), Datuk Seri Haji Hajiji Haji Noor, i minamaramit poinsonong kinapahabaran di Luguan Montiri Datuk Seri Anwar Ibrahim minoboros, gisom noondo diti Sabah nokosigampot no do 85.6 pihatus rikoton dilo’.
“Noroitan ku do noondo pomorunan ponombuluyan notonduli’, Koporintaan Pogun pinopoimpuun kimpin ponondulian ponombuluyan montok mongimbayat tutumombului gumuli’ kumaa Sabah.
“Gisom noondo, Sabah piniromut miampai kakadayan agayo China – Beijing, Shanghai, Shenzen, Guangzhou, Hangzhou, Wuhan, Macau om Hong Kong miampai 63 pontuludan tikid minggu om ginumu’ timpohon 11,360,” ka disio id kointalangan di tadau baino’.
Haji Hajiji Haji Noor
Rikod mintonod wulan Koiso’ gisom Kosiam toun diti nokopokito ginumu’ kinorikotan mantad China soginumu’ 45,801 nung piadangon di 4,162 no kinorikotan montok timpu miagal toun di nakatalib, ka disio.
Montok kinorikotan mamasok India kumaa Sabah, ka disio, haro kinoinsawaton miampai 4,176 kinorikotan gisom wulan Kosiam otun diti nung piadangon di 2,734 montok timpu miagal toun nakatalib.
Boyoon Montiri minomohulit do miampai kinopointutunan katatapan kosuangon 30 tadau aiso’ visa montok tutumombului mantad duo pomogunan bobos ogumu’ mogigiyon id pomogunan, kouhup ilo’ monginsikap koponondulian montok siktor ponombuluyan.
“Kalansanan dahai kokito lobi kogumu’ pioputan tawan montok mongingkawas korikotan tutumombului kumaa Sabah,” ka disio.
Montok sisimbar kumaa katatapan Malaysia, pinoruput do China pinapatatap montok popouyu kosuangon aiso’ visa kumaa tutumombului i mongigit pasport tomod mantad Malaysia, Perancis, Jerman, Itali, Belanda, Sepanyol mimpuun ko 1tw Kohopod om Duo 2023 gisom ko 30tw Kohopod om Iso’ 2024.
Mononomboros Komontirian Labus China, Mao Ning minoboros, mogigiyon mantad Malaysia om pomogunan Eropah di suai kaanu smuang China miampai aiso’ visa om miyon amu’ katalib do 15 tadau montok pongindopuan, ponombuluyan, kotombuluyan paganakan om nogi’ montok koumbayaan.
