Hajiji (koduo, gibang) miampai di Montiri id Koupisan Luguan Montiri Datuk Armizan Mohd. Ali (koduo, wanan) om Kumoduo Boyoon Montiri II po nogi’ Montiri Karaja’ Agayo, Datuk Ir. Shahelmey Yahya (gibang) di maso disio minonorikohon mitingan MTPNg.
KOTA KINABALU: Boyoon Montiri, Datuk Seri Haji Hajiji Haji Noor kaakun di atag koponuridongan puruankuasa’ piomungan Koporintaan Pogun-Pisompuruan montok mongulud kopoindalanan projik kopoburuan Pisompuruan id Sabah.
Minoboros isio, kohimpogongan do kopoindalanan toi kopomongohan projik Pisompuruan aanu monoibau miampai ponuridongan puruankuasa’ dilo’ id siriba’ kaganaan kuasa’ Upis Koburuon Sabah (SDO).
Boyoon Montiri nga’ minonuhu’ nogi’ do SDO maganu laang kohondot kuntiriktor i amu’ kopoindalan pibatosan diolo’.
“Tingkodon nopo kuntirik diolo’. Nokuro kuntiriktor maan tilombuso’ nanamot projik dilo’ amu’ insan kotimpuunai? Nunu po indadon (manaam kuntiriktor)?,” ka disio ontok minonorikohon mitingan Kounsol Karaja’ Kopoburuan Pogun (MTPNg) doid Menara Kinabalu, do hiti, di tadau baino’.
Montiri Kousinan, Datuk Seri Masidi Manjun pogulu diti minongulingad hal ponuridongan Masjid Watas Ranau i nokoinlaid nga’ aiso’ po laang popotingkod kuntiriktor.
“Mimang oku oinsanan komontirian, koupisan om kotinanan maganu laang mantad hal i pinawalad do SDO montok mongingkawas naangayan,” ka disio.
Hajiji minoboros, id Bajet Pisompuruan 2024 i pinawalad di Luguan Montiri, Datuk Seri Anwar Ibrahim di ko 13tw Kohopod katatalib, Sabah pinoobian RM6.6 bilion montok koburuon nung piadangon di RM6.5 bilion toun diti.
Minoboros isio, koporintaan Pisompuruan nga’ pinapatahak projik koburuon id siriba’ RM50 riong kumaa Kotinanan Teknikal Sabah montok popoingkawas po do waya’ kopoindalanan.
Koporintaan pogun om Pisompuruan nga’ nakaakun Sabah monowoli kuasa’ manamong pangaba’ lotirik do ko 3tw Koiso’ 2024, miampai koporintaan Pisompuruan kaakun montok monilombus subsidi Sabah Electricity Sdn. BHd. (SESB) gisom Palan Kosimbanon SESB koindalan turu’ toun mimpuun noondo.
Oinsanan diti, ka disio, atalang kopokito tonggungan Koporintaan Pisompuruan montok moningkanan do kopoburuan Sabah maya’ kopoindalanan Pibatosan Malaysia 1963 (MA63).
“Kohondot dilo’, oinsanan kotinanan popoindalan Pisompuruan om pogun kiguno mongingkawas naangayan, posuni pisokodungan om mongingkawas sinonong projik koburuon montok koundaran mogigiyon,” ka disio.
Boyoon Montiri minomohulit nogi’ do kopongunsuban mooi oinsanan Upisor Watas miontong naangayan projik koburuon, mongingkawas surupukaraja’ kapatahakan om monoibau hal komosikinan id kinoiyonon sompoopori.
“Tonggungan Puruankuasa’ Bertindak Koburuon Watas om Tinimungan Fokus Kesejahteraan Rakyat Watas nga’ kiguno nogi’ ingkawasan, poruputon kumaa bohogian sawat nung haro kobolingkahangan.
“Mositi’ tokou moningkanan di kopoindalanan projik kopotundaan sabab tumongob do poruntukan dilo’ amu’ korikot kumaa nayatan siriba’ sasabab no do amu’ opulokis,” ka disio.
Hajiji minoboros, oinsanan kooturan di nakalaid om amu’ kosudong mositi’ intangan kawagu om insonongan tumanud koyuyuon maso-maso.
