Lansanon PBS om STAR guminambar id pinibabarasan doid Kota Kinabalu do totuong tadau Kotolu.
KOTA KINABALU: Parti Bersatu Sabah (PBS) om Parti Solidariti Tanah Airku (STAR) nokosigampot piupakatan montok monimpuun pibabarasan pinotomod kapaharaan pihunungan om pisokodungan id pialatan goduduo parti.
Monunurat Agayo PBS, Datuk Julita Majungki om Monunurat Agayo STAR, Datuk Edward Linggu id kointalangan goduo di tadau baino’ diti minoboros, pibabarasan pinotomod nopo dilo’ nga’ mimpau kumaa hal ngaawi’ id siriba’:
- Montok monumboyo’ kopokionuan nayatan siriba’ i orohian kokito goduduo parti popiromut pisokodungan ogirot om po’ompus montok pisompuruan mogigiyon orukut tinaru.
- Sabaagi kotilombuson kumaa atag i nokoowit kumaa inggisaman id kawas pogulu Pomilian Agayo Pogun (PRN) di 2020.
- Montok monginggirot po do ginaras om sokodung kumaa Gabungan Rakyat Sabah (GRS).
Ka diolo’, piupakatan montok monimpuun pibabarasan pinotomod diti nosigampot id pinirubaan pialatan lalansanon goduduo parti dilo’ di ko 15tw Kohopod om Iso’ 2023.
“Goduduo parti minanahak tonggungan kumaa limo lansanon minongobi’ parti sopipoopori id pinibabarasan dilo’,” ka diolo’.
PBS obian di Julita, Luguan Kopointalangan, Datuk Joniston Bangkuai; Luguan Tinimungan Koonduan, Datin Malianah Ugau om i Luguan Tinimungan Komulakan, Christopher Mandut.
Naamot STAR obian di Timbang Presiden/Potunud Strategik, Dr. Paul Porodong; Edward Linggu; Luguan Kopointalangan, Datuk Jalumin Bayogoh; Luguan Tinimungan Koonduan, Datuk Flovia Ng. Om i Luguan Tinimungan Komulakan, Kong Soon Choi.
Ka diolo’, mitingan pinotomod kumoiso’ pohoroon id timpu toruhai.
